Basha-Olldashi, si do të ndryshojë lidershipi i PD-së

Fushata për zgjedhjen e Kryetarit të ri të Partisë Demokratike ka filluar, e bashkë me të edhe projeksionet se si mund të ndryshojë lidershipi i selisë blu, në varësi të fituesit. Ndërsa, Basha shihet si favoriti numër një për të pasuar Berishën, gazeta “Shqip” citon burime nga PD-ja që japin detaje mbi formatin e mundshëm që do të ketë PD-ja e re, në rast se kryebashkiaku i Tiranës merr shumicën e votave të anëtarësisë së demokratëve. Sipas gazetës, Basha do të ndjekë modelin Barack Obama-Hillary Clinton dhe nënkryetar të PD-së do të caktojë rivalin e tij në garë, Olldashin, i cili do ketë edhe postin e kryetarit të grupit parlamentar të kësaj partie. Vendi i tjetër i nënkryetarit do t’i takojë Majlinda Bregut. Ndërsa, sekretar i përgjithshëm mësohet se do të jetë Arben Imami, kurse Eduard Selami sekretar i Marrëdhënieve me Jashtë.

Nëse fitues i garës është Olldashi, ai pritet të rikonfirmojë si nënkryetar dhe kryetar të grupit parlamentar, Astrit Patozin. Majlinda Bregu shihet sërish si nënkryetare e PD-së, kurse Ridvan Bodes i ribesohet detyra e sekretarit të Përgjithshëm. Flamur Noka pritet të jetë sekretar organizativ për strukturat dhe Eduard Selami si sekretar i Marrëdhënieve me Jashtë.

Re.Pu