21 Janari në Gjykatën e Apelit. Ende pa filluar, procesi hyn përsëri në “kalendat greke”!

Seanca e parë gjyqësore në Apel ndaj tre gardistëve të akuzuar për vrasjen e tre protestuesve në 21 Janar, u zhvillua sot. Shorti për trupën gjykuese si relator i kishte rënë gjyqtarit Astrit Haxhialushi.  Çështja e 21 Janarit mbërriti në këtë gjykatë pas apelimit që Prokuroria i bëri vendimit të Gjykatës së Shkallës së Parë, që shpalli të pafajshëm ish-kreun e Gardës, gjeneral Ndrea Prendin dhe ish-komandantin e njësisë speciale Agim Llupo.

Gjykata argumentoi, në shkurt të këtij viti, se akuza e vrasjes në rrethana cilësuese ndaj dy të akuzuarve të prokurorisë nuk qëndron, për shkak se nga ana e të pandehurve nuk ka patur dashje për të vrarë demonstruesit. Prokuroria apeloi vendimin pak ditë pas zbardhjes së tij, duke i qëndruar akuzave se Prendi dhe Llupo janë autorët e vrasjes së tre demonstruesve, Faik Myrtaj, Ziver Veizi dhe Hekuran Deda. Vrasja e Aleks Nikës vijon të mbetet ende e pazbardhur edhe pse kanë kaluar më shumë se dy vite nga ngjarja e rëndë e 21 Janarit.

Po ç’ndodhi sot në Apel?  

Seanca e parë ka zgjatur vetëm pak minuta dhe është shtyrë për në datën 25 korrik. Avokati mbrojtës Genci Gjokutaj që mbron interesat e ish-shefit të Gardës Ndrea Prendi kërkoi që në nisje të seancës përjashtimin e gjykatësit Agron Papajani dhe Fatos Qato.  Avokati Gjokutaj, në pretendimin e tij tha se gjykatësi Agron Papajani ka marrë pjesë në një tjetër gjyq të zhvilluar për 21 Janarin, në ngarkim të gardistit Agron Llupo, ndërkohë që bashkëshortja e gjykatësit Fatos Qato një nga anëtaret e PS ka marrë pjesë në protestën e PS-së çka ndikon në gjykimin e çështjes. Gjykatësi Agron Papajani tha se kishte vendosur personalisht të jepte dorëheqjen pasi kishte marrë pjesë në gjyqin e zhvilluar ndaj gardistin Agron Llupo.

Rama në “Hard Talk” në BBC për 21 Janarin

“Vendimi për 21 janarin ishte i tmerrshëm. Mendoj që këto ngjarje s’do harrohen kurrë dhe them se nuk mund të gjykohen më me mënyrën e vjetër, pra atë të transformimit të fakteve. Do bëjmë gjithçka mundemi për një proces të drejtë dhe të pavarur. Sali Berisha ka përgjegjësitë e tij në lidhje me këto ngjarje, ka thënë Rama para dy ditësh në emisionin “Hard Talk” në BBC, cc’ka shton shpresat për një gjykim të drejtë dhe të pavarur.

Zh.