Kokëdhima kundër Ramës

Në numrin e sotëm të Shekullit viheshin re shenjat e para të një divorci të papritur. Është fjala për divorcin midis gazetës në fjalë e Edi Ramës. Në faqe të parë publikohej një intervistë me Paskal Milon, nga i cili kishin zgjedhur për të nënvizuar frazën “Rama ta vë veshin, veç kur ka litarin në fyt”. Komenti i Arben Rrozhanit ishte një kopaçe e fortë mbi shpinën e Ramës. Në faqen e letrave të lexuesve binte në sy që Vox Populi ish, si asnjëherë tjetër, totalisht kundër Ramës. Aty kish tituj si “Rama t’ia dorëzojë timonin një tjetri”, apo fraza si “me këtë intervistë Rama tregon se është i paaftë”, apo “drejtuesit e opozitës nuk meritojnë të rrinë aty, pasi janë të shkëputur nga populli për arsye ekonomike”, etj, etj.

Divorci Shekulli-Rama mund të konsiderohet pa frikë si një nga divorcet më të bujshme të dekadës së fundit. Shekulli ka qenë në vijimësi një nga mbështetëset e Edi Ramës në të gjitha betejat që ky i fundit ka bërë, e në të gjitha postet që ky ka mbajtur apo ka kërkuar. Financuesi i gazetës, Koço Kokëdhima, është njohur si mik i ngushtë dhe si eminenca gri e Ramës. Shumë prej vendimeve që ka marrë Rama gjatë viteve të fundit janë produkt i konsultimeve me Kokëdhimën, gjë për të cilën Rama është qortuar nga të gjitha anët. Ish-kryetari i bashkisë së Tiranës njihet si njeri që parapëlqen shumë lojën e kulisave, nëpërmjet të cilave ai synon të kontrollojë pushtetet e fortë, ndoshta dhe okultë, të vendit. Përse të jenë prishur vallë? Apo mund ta riqepin marrëdhënien?

E.G.