Slideri Kryesor

Ambasadori turk në Shqipëri, Hydajet Bajraktar i ka dhënë një imtervistë gazetës “Shekulli”, përmes së cilës sqaron pozicionin e Ankarasë zyrtare për grushtin e shtetit të 16 korrikut. Ai ka deklaruar se Turiqa pret bashkëpunim nga të gjitha vendet dhe ka marrë mbështetje nga të gjithë anëtarët e NATO-s. Bajraktar shton se “është gabim që t’i faturohet cdo gjë që ndodhi ushtrisë”, duke theksuar rolin që qeveria turke i jep organizatës FETO, të themeluar nga Fetullah Gulen.

Kolonizimi izraelit i West Bank është kryer mbi pretendime false. Gazeta e majtë izraelite “Haaretz” referon dokumente sekrete të viteve ’70, sipas të cilave kjo është ditur nga vendimmarrësit më të lartë të shtetit dhe është vijuar pavarësisht se binte ndesh me ligjet ndërkombëtare.  Në dokumentin që gazeta pretendon se e disponon, jepen hollësi ngan mbledhje ku merrte pjesë ish-ministri i Mbrojtjes, Moshe Dayan, të cilit qeveria dhe drejtuesit ushtarakë i kishin dhënë të drejtën dhe instruksionet si ta kryente këtë mashtrim me ndërtimet e reja në zonën e Kiryat Arba, pranë Hebronit.

Ministria e Financave arsyetoi dje përmes ministrit Arben Ahmetaj se arsyeja për të ulur kufirin e tatueshëm për blerjet online është shmangia e konkurencës së pandershme. Pasi shumë tregëtarëvtë vegjël ndjekin këtë praktikë për të futur në treg mallra me vlerë të vogël, duke dëmtuar tregëtarët që paguajnë rregullisht detyrimet. Por sipas revistës “Monitor”, Posta Shqiptare raporton se 75% e pakove kanë vlerë 100 euro. A bëhet tregëti me 100 euro?

Sot mediat kryesore në Europë njoftojnë se qeveria turke, në krye të së cilës de facto është presidenti Reccep Tayyip Erdogan, ka mbyllur 130 organizata mediatike, mes të cilave televizione, gazeta, shtëpi botuese. Është një hap i fundit i radhës në atë që po ndodh në Turqi pas tentativës së dështuar për grusht shteti më 15 korrik. Një grusht i formuluar zyrtarisht si i tillë pas të cilit Erdogan ka arritur të imponojë një tërmet shtetëror, institucional e njerëzor me magnitudë të lartë: nga 6000 të arrestuar, 2745 janë gjyqtarë.

Dje Partia Demokratike deklaroi përmes deputetes Jorida Tabaku se me ardhjen në pushtet do të anulohet koncesioni i fundit për rrugën Durrës-Kukës, i cili u vendos atyre që lëvizin në atë rrugë një tarifë të lartë. Ky është një deklarim shumë problematik dhe me gjasë me axhendë tjetër nga ajo që lidhet me interesin e shqiptarëve.

Vendimi i qeverisë shqiptare për të ulur kufirin e patatueshëm të blerjeve online në 22 euro ka provokuar një debat në mbledhjen e djeshme. Ai zbardhet nga gazeta “Panorama” dhe provon se halli i Ministrisë së Financave nuk është aspak rritja e të ardhurave, por sepse është cenuar konkurenca e ndershme. Ahmetaj ka debatuar me Manjanin, ministër i Drejtësisë dhe shihet se ndonëse argumentet e tij, teorikisht qëndrojnë, për asnjë çast ministri nuk vlerëson tek blerjet online një rrugë me më pak kosto për qytetarë që nuk janë të gjithë tregëtarë dhe që nuk kanë ofertë në vendin e tyre.

Gjatë mbledhjes së djeshme të Këshillit të Ministrave u vendos që të jepen dy zona plazhi në përdorim për 20 vite bazuar mbi ligjin e investimeve strategjike të kaluar në Kuvend gjatë vitit 2015. Bëhet fjalë për dy ndër rastet e para të aplikimit të këtij ligji. Kujtojmë që ligji u kalua me njëfarë urgjence vitin e kaluar sepse mendohej se do të plotësonte një boshllëk në legjislacionin vendas krahasuar me vendet fqinje.  Maqedonia, Mali i zi si dhe Serbia kanë përfituar nga investime të huaja direkte në vlera të konsiderueshme gjatë viteve të fundit.

Fatmir Xhafa tha sot se ndërkombëtarët kanë kërkuar futjen me procedurë të përshpejtuar të Ligjit të Vettingut ose siç njihet ndryshe Ligji për Vlerësimin e Gjyqtarëve dhe Prokurorëve, duke kërkuar që ligji madje të miratohej këtë të enjte, ndonëse procedura e kërkonte që miratimi i 7 ligjeve shoqëruese të paketës të reformës në drejtësi të bëhej 15 ditë pas dekretit të presidentit.

Një pjesë e vijës bregdetare në Palasë e Himarë do t’i jepet për 20 vjet në përdorim një resorti turistik që po ndërtohet nga Balfin Grup,  që drejtohet nga Samir Mane. Vendimi është publikuar në faqen zyrtare të qeverisë, ku thuhet se  qeveria vendos lejimin e përdorimit të brigjeve të detit dhe të zonës përkatëse në funksion të realizimit të projektit investues strategjik “Green Coast”, Palasë, Himarë, zona kadastrale 1481-1739, i cili ka përfituar statusin e investimit strategjik, procedurë e veçantë, me vendimin nr.2/13, datë 14.7.2016, të Komitetit të Investimeve Strategjike.

Majlinda Bregu, kryetare e Komisionit Parlamentar të Integrimit dhe një aleate e nënkuptuar e Edi Ramës në procesin eventual të votimit të reformës në drejtësi pa konsensuin e PD-së, tha sot për AbcNews se kalimi i ndryshimeve kushtetuese dhe ligjeve shoqëruese, mund të çojnë në propozimin nga Komisioni Europian, për çeljen e negociatave për anëtarësim në BE.  7 ligjet që po diskutohen duhet të miratohen para muajit tetor, kur edhe publikohet raporti vjetor, në të cilin sipas Bregut, mund të ketë një propozim nga Komisioni.