Blloku Bota

ISIS paralajmëron të tjera sulme të përgjakshme në Europë pas masakrës së Brukselit. Kësaj radhe mesazhi vjen nga një prej kokave të Shtetit Islamik, Hicham Chaib, i cili në një postim video thotë se Europa nuk vuri mend nga sulmet në Paris. "Ato që ndodhën në Bruksel janë vetëm një shije e asaj që do të pasojë" deklaron Chaib duke ekzekutuar një peng të gjunjëzuar parabtij. Më tej ai shton "ky është një mesazh për popullin belg, për qeverinë belge, për Europën dhe pjesën tjetër të botës që lufton me Shtetin Islamik. Për sa kohë do të na bombardoni me F 16 ne do t'ju vrasim"

Një foto e publikuar në faqen online “Mediapart” ku paraqitet kryeministri izraelit Benjamin Netanyahu me një biznesmen gebreo-francez, Arnaud Mimran, ka prodhuar një akuzë të re për kreun e qeverisë në Telaviv. Lajmi është riprodhuar nga e përditshmja “Haaretz”, e cila nënvizon se Mimran është një person që akuzohet se në bashkëpunim me disa të tjerë kanë mashtruar BE-në në shifrat e 282 milionë eurove.

Irani ka nisur punën për ndërtimin e një kanali që do të lidhë Detin Kaspik me Gjirin Persik. Projekti mendohet të përmbyllet në vitin 2020 dhe ai do të kushtojë 7 miliardë dollarë. Projekti mendohet që të hapë rrugët edhe për Rusinë, një vend që ka probleme me Turqinë, rruga natyrore e lidhjes me Perëndimin dhe Jugun, por siç propagandojnë mediat shtetërore ruse, kanali rivalizon edhe kanalin e njohur të Suezit. Po këto media raportojnë se Perëndimi dhe Turqia i janë kundërvënë projektit në fjalë duke vendosur sanksione ndaj kompanive që janë përfshirë në projekt.

Sari Falah al Asari quhet adoleshenti që shpërtheu veten në erë në një stadium në Irak duke shkaktuar vdekjen e 65 personave dhe plagosjen e 60 të tjerëve. Akti terrorist vjen vetëm pak ditë pas shpërthimeve në Bruksel dhe është marrë përsipër nga Shteti Islamik. Adoleshenti hodhi veten në erë në momentin që lojtarët e dy skuadrave dhe kryebashkiaku i qytezës po përgatitesh për ceremoninë e fitimit të Kupës. Mes viktimave është dhe kryebashkiaku i qytetit.

Papa Françesku tërhoqi edhe njëherë vëmendjen për natyrën kontraverse në raport me rregullat e Kishës Katolike. Ai lejoi gratë të merrnin pjesë në ritualin e larjes së këmbëve nga Papa të 12 njerëzve, në respekt të asaj që Krishti bëri me 12 dishepujt e tij. Përveç lejimit të grave në këtë ceremoni kishtare, Papa përzgjodhi për ritualin 8 burra dhe 4 gra të kombësive dhe feve të ndryshme, ndryshe nga rregulli dhe tradita e Kishës Katolike. Simbolika sipas zëdhënësit të Vatikanit lidhet me mesazhin që Papa kërkon të përcjellë se gjithkush duhet të respektohet për besimin e tij.

Policia belge është në kërkim të dy personave që besohet se kanë qenë pjesë e sulmeve terroriste të 22 Marsit , bashkë me dy vëllezërit El Bakraui dhe Nazhim Lashrauin. Këta tre të fundit mbetën të vdekur në shpërthimet në metro dhe aeroport, ndërsa personi me kapele dhe një tjetër i paidentifikuar janë ende në arrati. Kjo e çon në 5 numrin e autorëve të masakrës së Brukselit.

Johan Cruyff, ish-futbollist i Ajax dhe Barecelona, ka ndërruar jetë në moshën 68 vjeçare si pasojë e kancerit në mushkëri. I konsideruar ndër më të mirët e të gjitha kohërave, ai shkëlqeu edhe me kombëtaren holandeze në kampionatin botëror të vitit 1974.

"Le Monde" doli të mërkurën me një skicë homazh për masakrën e Brukselit. Qëllimi ishte shprehja e solidaritetit të Francës me popullin belg. Skica tërhoqi vëmendjen e rrjeteve sociale dhe shkaktoi reagime të ndryshme. Shumë ishin ata që e postuan në llogarite e tyre personale, duke ngjallur reagimetë shumta në Turqi dhe postimin e një tjetër skice me mbishkrimin "Sot në krah të Belgjikës dhe Francës është edhe Turqia e lënduar nga sulmet kamikaze të disa ditëve më parë"..

Pse u tërhoq Vladimir Putin nga Siria? Kjo pyetje lidhet me një vendim të befasishëm të presidentit rus, para disa javësh dhe ende nuk ka një përgjigje përfundimtare. Shumica e mediave që marrin në analizë aktin e Kremlinit, nënvizojnë se Rusia nuk është tërhequr realisht nga Siria, por ka reduktuar praninë e saj. Gjithnjë duke vlerësuar se objektivi real i Kremlinit në Siri ishte mbajtja e Bashar al Assadit në pushtet, por jo në mënyrë të pakushtëzuar.

Presidenti turk, Rexhep Taip Erdoan tha se kamikazi belg Brahim El Bakraui, i vetëvrarë në sulmet kamikaze në Bruksel është deportuar nga Turqia në korrik të vitit 2015, pas arrestimit, në qershor të 2015.  Autoritetet turke kishin paralajmëruar ato belge se ai ishte militant islamik.  Megjithatë, El Bakraoui ishte lënë i lirë nga autoritetet belge, pasi nuk ishin zbuluar lidhje me terrorizmin.  Erdoan tha se “Belgjika shpërfilli paralajmërimit e Ankarasë”.  Me kërkesë të tij, El Bakraui u kthye më pas  në Holandë.