Virologia kineze, Shi Zhengli, shkencëtare në Institutin e Virologjisë në Vuhan, hedh sërish poshtë hipotezën se virusi SARS CoV 2 mund të ketë dalë nga laboratori ku punonte ajo. Në një intervistë për “New York Times”, ajo mohon që tre prej punonjësve të këtij laboratori të jenë sëmurur në nëntor të 2019, duke shfaqur simptoma të ngjashme me ato të Covid-19, siç pretendojnë agjencitë amerikane të inteligjencës. “Nuk kemi pasur asnjë rast. Nëse ju i keni, më jepni emrat që t’i verifikoj”.

Një valë e re të nxehti ekstrem do të përfshijë disa shtete të Amerikës. Shërbimi Kombëtar i Motit (NWS) parashikon që temperatura mbi 49 gradë Celcius do të përfshijnë shtete si Utah, Kaliforninë jugore dhe qendrore, më pas Nevadën dhe Arizonën. Më shumë se 48 milionë amerikanë, në perëndim të vendit janë paralajmëruar për valën e të nxehtit.

Që nga fundi i Luftës së Ftohtë, arsenali bërthamor në botë është tkurrur. Por vitet e fundit, kjo tendencë rënëse është ngadalësuar. Një raport i hartuar nga Instituti Ndërkombëtar për Kërkime mbi Paqen (SIPRI) ka dalë në konkluzionin se më shumë koka raketash bërthamore janë bërë pjesë e operacioneve, pavarësisht nga reduktimi i përgjithshëm i numrit të kokave të regjistruara deri në vitin 2020.

Kompanitë që ia dolën me pandeminë po përballen me një problem të ri: më shumë se një e katërta e punonjësve të tyre mund të largohen. Ekonomistët i druhen asaj që e quajnë “dorëheqja e madhe”.

Kjo pasi sondazhet tregojnë se nga 25% deri në 40% e punëtorëve po mendojnë të lënë punën. 

Liderët e NATO-s u mblodhën në Bruksel për të diskutuar mbi strategjitë me të cilat aleanca perëndimore duhet t'i përgjigjet ngritjes ekonomike, politike dhe ushtarake të Kinës. Megjithatë, ata e shmangin idenë e “një Lufte të Re të Ftohtë” me Pekinin.

Ka marrë fund misteri i vendndodhjes së mbetjeve të ish-kryeministrit të Japonisë militariste, Hideki Tojo, ekzekutuar me varje në vitin 1948 nga amerikanët si kriminel lufte. Profesori japonez i universitetit të Nihon, Hiroaki Takazawa, ka zbuluar në arkivat amerikane, dokumente të deklasifikuara që zbulojnë se çfraë ndodhi me mbetjet e Tojos, i cilësua si arkitekti i sulmit mbi Peral Harbor.

Presidenti lituanez, Gitanas Nauseda ka deklaruar gjatë samitit të fundit të NATO-s, se Rusia po përpqiet të gëlltisë Bjellorusinë.

Bjellorusia po humbet elementët e fundit të pavarësisë dhe këto prirje janë shumë të rrezikshme. Do të prisja që presidenti amerikan Biden të dërgojë një mesazh të qartë rreth vendosmërisë  dhe unitetit të NATO-s dhe se do të reagojë me mesazhe shumë të qarta për atë që po ndodh

Parlamenti izraelit i dha sot votëbesimin një qeverie të re koalicioni, duke shënuar kështu largimin e Benjamin Netanjahut pas më shumë se një dekade në drejtimin e vendit. Megjithëse me mbështetjen minimale të Parlamentit (60 pro, 59 kundër dhe 1 abstenim), qeveria e re e kryeministrit Naftali Bennett merr detyrën.

Yair Lapid (aktualisht ministër i Jashtëm), një lider centrist, do të zërë vendin e z. Bennett pas dy vitesh, nëse qeveria e dy aleatëve do të qëndrojë në këmbë deri atëherë.

Komisioni Evropian ka ndërmarrë hapa ligjorë ndaj Gjermanisë, pas një vendimi që ka dhënë Kushtetuesja në këtë vend në lidhje me blerjen e bonove. Në maj të vitit 2020, gjykata më e lartë e Gjermanisë, me seli në Karlsruhe, vendosi që Banka Qendrore Evropiane (BQE) kishte tejkaluar kompetencat së saj me blerjet e bonove.

Por Gjykata Evropiane e Drejtësisë ndërkohë i kishte hapur dritën jeshile blerjes së bonove nga BQE-ja, pasi kishte dalë në përfundimin se programi i blerjes së obligacioneve të BQE ishte në përputhje me ligjin e BE.

Një raport i World Wide Fund for Nature paralajmëron se Mesdheu po shkon drejt shndërrimit në një det tropikal. Temperaturat në detin ku hyn edhe vendi ynë po rriten 20% më shpejt sesa mesatarja botërore çka ka sjellë për pasojë e ndryshimin e regjimit migrator të peshqve. Barrakuda p.sh, një peshk i Mesdhut jugor ka lëvizjr drejt veriut, ndërkohë që nga Kanali i Suezit kanë hyrë 1000 specie invazive që kanë zëvendësuar speciet origjinale.