Pas 4 vitesh rroga për një administratë që na u tha se u zgjodh përmes konkurseve, kryeministri pranon se në mandatin e parë me emërimet është ndjekur vetëm një kriter ai politik, ose punë ka zgjidhur vetëm tesera e partisë.  Nga mbledhja e kabinetit qeveritar në Vlorë Rama u ka kërkuar gjithë ministrave një skanim të burimeve njerëzore, për të bërë përputhshmërinë mes diplomës dhe punës.

Para qershorit qeveria u shpërndau çertifikata të tokës bujqësore disa banorëve të zonave rurale, me prezencën e vetë kryeministrit. U lajmërua fundi i një zvarritje 25 vjeçare të titujve të pronësisë për tokën e ndarë me ligjin 17501, si për tokën e dhënë në pronësi edhe atë në përdorim. Por në takimin që u mbajt të premten me banorë të Vlorës në kuadër të bashkëqeverisjes me qytetarët, ministri i ri i Bujqësisë, Niko Peleshi u detyrua të pranojë se ky proces nga ngecur dhe se do të ketë një tjetër shtyrje të afatit, siç është operuar edhe në të shkuarën.

Marrëveshja për programin bërthamor të Iranit po shfaqet si një çështje që destabilizon skenën politike globale. Presidenti amerikan Donald Trump refuzoi ratifikimin e marrëveshjes nga ana e SHBA-ve me argumentin se Irani financon terrorizmin. Pas kësaj deklarata Trump u ballafaqua me kritika të ashpra nga presidenti i Iranit, Hasan Rouhani, i cili foli për "akuza të pabaza", ndërsa zyrtarë evropianë i kërkuan kreut të Shtëpisë së Bardhë të rimendojë veprimet e tij.

Ekspertë të rëndësishëm të sigurisë në Gjermani nuk e shikojnë më SHBA-në si aleaten më të rëndësishme dhe mendojnë që Berlini duhet të përqendrohet në çështjet e mbrojtjes më tepër te BE-ja në vend të NATO-s. Ky është rezultati i një anketimi të 200 ekspertëve të mbrojtjes nga radhët e politikës, sipërmarrjeve, organizatave ndërkombëtare dhe medieve, të cilat i ka publikuar Qendra Kërkimore e Brukselit "Friends of Europe" së bashku me një libër.

Bashkimi Sovjetik ka realizuar sipërmarrjen hartografike më të madhe në historinë e njerëzimit. Fakti del në dritë nga një kërkim i një të apasionuari pas hartave, John Davies dhe Alexander Kent, gjeograf në Universitetin e Canterbury, të cilët kanë publikuar një libër me titullin: “Atlasi i kuq”. Librit i kushtohet vëmendje edhe nga National Geographic, që sjell edhe disa foto nga realizimet e kartografëve sovjetikë që përfshijnë në harta hollësi thuajse të paimagjinueshme për rrjetin urban, rrugor deh gjeografik.

Kompania japoneze e përpunimit të çelikut “Kobe Steel” bëri me dije se  numri i kompanive që janë prekur nga skandali i falsifikimi të të dhënave në lidhje me cilësinë dhe qëndrueshmëri e aluminit, bakrit dhe 9 produkteve të shitur prej saj në 10 vitet e fundit janë nga 200 deri në 500.  Skandali ka çuar në një rënie prej 1.8 miliardë dollarësh në vlerën e tregut të “Kobe Steel” këtë javë.

U propozua si një reformë që do të rriste ndjeshëm investimet në fshat dhe zonat rurale nga kursimet që do të krijonte shkurtimi i numrit njësive vendore.

Sipas qeverisë së mëparshme reforma e re territoriale do t’i kursente buxhetit vendor rreth 6 miliardë lekë shpenzime administrative, të cilat do të shkonin për shërbime dhe investime publike në favor të komuniteteve. Kjo shkruhej dhe në relacionin e ligjit, por ekziston edhe më zë dhe me figurë siç tregohet në këtë kronikë televizive të vitit 2014.

Shaka personale, i quajti  Jean-Claude Juncker deklaratat për shfuqizimin anglishtes si gjuhë zyrtare të BE-së, pas zbatimit të BREX-it.  "Gradualisht anglishtja po humbet rëndësinë e saj në Evropë", deklaroi Juncker në një konferencë në Firence teksa fliste në gjuhën angleze dhe pastaj vazhdoi në frëngjisht, duke provokuar duartrokitje në sallë. I pyetur nëse frëngjishtja do të ishte gjuha e ardhshme e Evropës, Juncker u përgjigj në anglisht: "Është gjithmonë e rrezikshme ta thuash këtë."

Nga janari qeveria do të fillojë të mbledhë taksën e pronës, një tarifë që do të vendoset mbi vlerën reale të tregut të dhe do të vilet përmes faturës së energjisë elektrike. Burime zyrtare në Ministrinë e Financave thanë për televizionin Klan se rritja për individët do të variojë nga 20- 50% të shumës që paguhet sot, ndërsa për godinat në periferi nuk do të ndryshojë. Bizneset, që aktualisht paguajnë një tatim të lartë, do të kenë një taksë më të zbutur vitin e ardhshëm.