“Elefanti” në dhomë!

Saimir Tahiri ishte personi i parë që përmendi publikisht mundësinë se mund të burgosej. E bëri këtë në rrëfimtoren e Blendi Fevziut duke iu dridhur mjekra. 

Kanë kaluar muaj që nga ajo mbrëmje dhe sot ish-ministri i Brendshëm është shfaqur në Prokurori ku siç thuhet ka dorëzuar disa prova të reja. 

Ky është po ai njeri që deklaronte se kishte përdorur makinën e Habilajve pasi e kishte shitur dhe se ky ishte një gabim. Kur sheh se çfarë na kanë dëgjuar veshët këto kohë, Tahiri ngjan ndoshta edhe si i pafajshëm. 

Paditë për shpifje bëjnë punë. Të paktën në Turqinë e Erdoganit, ku norma në fjalë zbatohet rregullisht. I akuzuar si një autokrat, presidenti turk ka gjetur rrugë të tjera, qoftë për të diskredituar kundërshtarët, qoftë për të mbushur xhepin.

Mediat turke njoftojnë se kreu i Partisë Republikane Popullore, Kemal Kiliçdaroglu është detyruar të shesë një prej shtëpive të tij për të paguar gjobat e marra për shkak të padive për shpifje nga Erdogan.

Ngjarja e Bularatit po nxjerr në pah një pikë të dobët, të paktën sipas versioneve zyrtare: vrasjen e protagonisit Konstandinos Katsifas. Ky thuhet se ka patur një armë, Kallashnikov me të cilin ka qëlluar ndaj policisë. Kjo e fundit, më saktë forcat Renea, kanë bërë thirrje për dorëzim, por ai ka vazhduar të qëllojë çka ka sjellë neutralizimin. 
Ka zëra që thonë se Katsifas mund të kapej i gjallë, pasi në fund fare do t’i mbaronte municoni dhe tentativa e tij ekstreme do të mbaronte me arrestim. Një gjë e tillë nuk ndodhi. 

Ngjarja e së dielës në Bularat ku mbeti i vrarë Konstandin Kacifas ka dritëhijet e veta, por nga reagimet bie në sy solidariteti i të ashtuquajturës Rinia e Vorio Epirit dhe Partia Agimi i Artë

Aktivistë të Rinisë së Vorioepirit protestuan mbrëmë para ambasadës shqiptare në Athinë për vrasjen e 35 vjeçarit. Me flamuj të Epirtit të Veriut ata bënë homazhe me fotografinë e viktimës, duke ndezur qirinj dhe kënduar himnin kombëtar të Greqisë.

Athina zyrtare ka bërë sot thirrje që autoritetet shqiptare të shmangin retorikën nxitëse pas ngjarjes së Bularatit. Në një dalje televizive, zëdhënësi i qeverisë greke, Dimitris Tzanakopoulos tha se autoritetet greke po marrin të gjitha masat e nevojshme në kësi rastesh për të sqaruar rrethanat e sakta të vdekjes së grekut etnik në Shqipëri. 

Nuk duhet të nxitohemi për të nxjerrë konkluzione. Ne jemi në kontakt me autoritetet shqiptare

Edhe pse jam pjesë e popullit italian, pa i rënë ndesh zëvendëskryeministrit Salvini, nuk ndihem aspak i sulmuar kur eurokomisioneri Moscovici kritikon manovrën fianaciare të qeverisë së Romës. Madje mendoj se Moscovici ka sigurisht argumente për qëndrimin e tij (ato me të vërtetë decizive i kanë blerësit e borxhit tonë publik). Megjithatë, është mëkat që si institucioni që përfaqëson, pra Bashkimi Europian, nuk ka më prezencë dhe besueshmëri politike. Nga kjo pikëpamje, Moscovici të kujton Gorbaçovin.

Ministri i Jashtëm Alternativ i Greqisë, Giorgos Katrougalos ka thënë në një intervistë për Real News se Greqia do të zgjerojë ujërat territoriale në 12 milje në momentin që do ta shohë të përshtatshëm. Sipas tij, kjo është një e drejtë që rrjedh nga ligji ndërkombëtar dhe askush nuk mund ta kundërshtojë atë. Lidhur me marrëveshjen për kufirin detar me Shqipërinë, Katrougalos ka thënë se ajo është afër përfundimit, por se nga pala shqiptare po pritet plotësimi i vakancës në Gjykatën Kushtetuese që shihet si garanci e munguar. 

Në politikë thonë se vota është lakmuesi më i mirë. Që ndan egjrën nga kashta. Mund të biesh dakord me këtë shprehje, por mundet edhe mos të jesh. Në çdo rast, asnjë politikan nuk mund të tërheqë për hunde shoqërinë pafundësisht. Ky është rasti me Shpëtim Idrizin, që pasi u degdis me vota jashtë Parlamentit, së fundmi ka nisur të rihapë dyqanin e patriotizmit në stendat e të cilit shpall patriotë dhe tradhëtarë.