Liderja franceze e ekstremit të djathtë, Marine Le Pen, ka marrë një hua prej 10.6 milionë eurosh nga një bankë hungareze për të financuar fushatën e saj zgjedhore presidenciale. Lajmin e bën të ditur radio RTL, të cilës i referohet Euractive. Le Pen duket se ia ka dalë ta gjejë në Hungari atë që nuk mundi ta gjente në vendin e vet, ku sipas një deklarate të bërë kohët e fundit, bankat franceze nuk ia kanë dhënë një mundësi të tillë.

SHBA do të dërgojë trupa shtesë në Poloni, Gjermani dhe Rumani, në përgjigje të tensioneve në rritje mes Rusisë dhe Ukrainës. Lajmin e bëjnë të ditur burime të administratës amerikane. Biden do të dërgojë 2 000 trupa këtë javë nga Fort Bragg, Karolina e Veriut, në Poloni dhe Gjermani dhe një pjesë të një skuadroni Stryker prej rreth 1 000 trupash me bazë në Gjermani, në Rumani.

Zëdhënësi i Pentagonit, John Kirby shpjegoi se 3 000 trupat amerikane që do të dërgohen në Evropën Lindore janë ndër 8 500 të tilla, që kanë hyrë në gjendje gatishmërie.

Administrata amerikane Joe Biden ka ndërmarrë një nismë të fundit që shkon përtej disa standardeve të deritanishme, në mënyrë që të shmangë një konflikt në Ukrainë. “Bloomberg" raporton se Washingtoni i ka ofruar Kremlinit mundësinë e verifikimit të dispozitivit ushtarak në bazat e NATO-s në Rumani dhe Poloni.

Mediat në Hollandë raportojnë për një lloj lajmi bizar. Në Roterdam, Këshilli bashkiak ka vendosur të çmontojë pjesërisht urën e celikut De Hef për një arsye të papritur: të mundësohet kalimi i jahtit të miliarderit të Amazon, Jef Bezos. Ura u rinovua në vitin 2017 dhe sipas mediave hollandeze atë kohë u deklarua se nuk do të çmontohej më, por fjala e dhënë ka zgjatur vetëm 4 vjet.

NASA ka vendosur të tërhiqet nga Stacioni Ndërkombëtar Hapësinor (ISS). Ky i fundit do të jetë funksional deri në vitin 2030, për t’u zhytur më pas në një zonë të Oqeanit Paqësor, të njohur si Point Nemo.

Këtë “dalje në pension”, NASA po e shet si një "kalim i operacioneve te shërbimet tregtare", duke ritheksuar mbështetjen e përpjekjeve private-publike në orbitën e Tokës.

Diskutimi për shkarkimin e Presidentit të Republikës ka mbërritur deri në diskrecionin politik të Taulant Ballës. Nuk duam të fyejmë kënd, por teksa z. Balla sot, në cilësinë e drejtuesit të Grupit Parlamentar të PS-së, paralajmëronte se Gjykata Kushtetuese do ta shkarkojë Ilir Metën, shtonte edhe konsideratat e veta për qëndrimet publike të Presidentit. 

Mirëpo zoti Balla harron të shohë veten ose e shmang një gjë të tillë, pasi njësoj si Meta ai mishëron një mospërputhje mes funksionit që ka dhe figurës që teorikisht duhet ta ushtronte atë. 

Aktori Anastas Kristofori është ndarë sot nga jeta në moshën 79-vjeçare. Kristofori lë pas një larmi rolesh, si në skenën e Teatrit, edhe në ekran.

Ai lindi më 28 nëntor 1943 në Vuno të Vlorës. Pasi mbaroi studimet e larta në Institutin e Lartë të Arteve në vitin 1970, Kristofori iu bashkua trupës profesioniste të Teatrit Popullor në vitin 1971.

Një burrë kontestoi lutjen e Papa Françeskut në Vatikan sot, duke bërtitur: "Kjo nuk është Kisha e Zotit!", në anglisht. Një dëshmitar i tha agjencisë Reuters se burri u dëgjua teksa përmendte edhe fjalën "maskë", ndërsa mbante në dorë një të tillë mjekësore.

Një në pesë njerëz në Afrikë vuan nga kequshqyerja. 93 milionë njerëz në 36 vende janë pa ushqim në kuptimin e drejtpërdrejtë të shprehjes. Sipas një raporti të Oxfam, më të prekurit janë gratë dhe fëmijët.

Në rajonin sub-Saharian, një fëmijë vdes nga uria çdo 30 sekonda, ndërsa 2 në 5 gra (në moshë riprodhuese) vuajnë nga anemia për shkak të mungesës së ushqimit, shton Oxfam, e cila saktëson se çmimet e ushqimeve në të gjithë kontinentin kanë arritur shifra rekord.

Organi drejtues i Dhomës së Deputetëve Spanjollë (i ashtuquajturi 'Mesa del Congreso') ka pranuar kërkesën e tre palëve për të krijuar një komision hetimor për rastet e mundshme të abuzimit të fëmijëve të kryera brenda Kishës Katolike. Ky është hapi i parë drejt analizimit, diskutimit dhe votimit të kërkesës nga parlamentarët.

Kërkesa u bë nga Podemos, një nga dy anëtarët e koalicionit qeverisës të qendrës së majtë, dhe nga dy parti të Katalonjës dhe Vendeve Baske (Esquerra Republicana dhe Eh Bildu).