Pavarësisht se e konsideron realist pozicionin e ri që ka marrë Ukraina në raport me neutralitetin dhe statusin bërthamor, Rusia thotë se ende nuk ka një draft të qartë traktati mes dy vendeve. “Një draft traktati midis Rusisë dhe Ukrainës nuk është ende gati për t'u paraqitur në takimin e nivelit të lartë, ndërsa Ukraina është bërë më realiste në qasjen ndaj çështjes së statusit të saj neutral dhe jo-bërthamor”, citohet nga TASS, ndihmësi i presidentit rus, Vladimir Medinsky.

Baza e të dhënave të votuesve shqiptarë, e cila u bë publike para zgjedhjeve të 25 prillit 2021, përbën cenim të rëndë të të drejtave të njeriut. Në raportin vjetor, Amnesty International nxjerr në pah skandalin e patronazhistëve si dhe rrjedhjen e listës së pagave dhe të dhënave të tjera si raste flagrante të shkeljes së të drejtave të njeriut përgjatë 2021-shit.

Në Francë, admiruesit e Gérard Depardieu janë të vetëdijshëm për dallimin mes aktorit dhe individit. I njohur për miqësinë me Putin, aktori francez i parapriu me një deklaratë për shtyp shfaqjes së tij për tre net radhazi në Teatrin Champs-Elysées.

Në fakt, deklarata iu kërkua nga ky i fundit, me frikën se shfaqja mund të kompromentohej nga miqësia e Depardieu me Vladimir Putin.

Mediat e Perëndimit i tregojnë botës një realitet tjetër nga ai që është në të vërtetë në Rusi. Me këtë bindje, Ivan Rorato, kuzhinier venecian, i ka mbushur rrjetet e tij sociale me postime që kundërshtojnë atë që ai e quan rusofobi.

Rorato thotë se shumë nga lajmet e përhapura në mediat perëndimore janë të rreme, duke nisur që nga mbyllja e dyqaneve të Mc Donald's.

“Nuk do të kthehem pasi këtu jam dhjetë herë më mirë”, shkruan ai, duke dhënë si arsye çmimin e benzinës, gazit, sigurimit të makinës, qumështit, miellit dhe mallrave të tjera.

Në Kamerun është rishfaqur kolera. Sipas shifrave të Ministrisë vendase të Shëndetit Publik, që nga shkurti janë regjistruar mbi 6 000 të infektuar dhe kanë humbur jetën 100 prej tyre.

Në disa zona është vendosur karantina. Limbe është zona më e prekur. Që prej shkurtit, atje janë regjistruar të paktën 800 raste.

Megjithë sanksionet thuajse totale, dikush po ble në masë naftën ruse. Kështu raporton revista online “Fortune” sipas të cilës produktet e naftës dhe tankersat rusë të transportit janë zhdukur nga sistemi i gjurmimit. Kompania e menaxhimit të riskut detar, “Windward” i ka deklaruar CNN se aktiviteti i paregjistruar është rritur me 600% që nga nisja e luftës në Ukrainë, çka tregon se ka një tregti që shkon përtej sanksioneve.

Klima dhe ndryshimet e saj po bëhen tanimë problem real edhe për ekonomitë e vogla. Mediat në Turqi raportojnë se një numër përherë e më i madh fermerësh po aplikojnë për sigurim nga thatësira që provokon pasoja ekonomike serioze.

Vetëm në tre muajt e parë të vitit 2022, primi i sigurimit në bujqësi shkoi në 3 miliardë lira, pjesa më e madhe e të cilit për thatësirën. Kërkesa për sigurim ndaj thatësirës u rrit me 300%

200-250 vjet perandori, përmendje në burimet e antikitetit të vonë, por asnjë e dhënë tjetër. Kush ishin Avarët, këta luftëtarë të njohur të stepës euroaziatike? Përgjigjen mund ta japë gjenetika, teksa një grup nga Instituti “Max Planck” për Antropologjinë Evolucionare ka marrë në studim disa kadavra antike të elitës avare.

Ushtria amerikane ka anulluar testin e raketës ndërkontinentale, Minuteman III për shkak të krizës ukrainase. Më herët testi ishte shtyrë në kohë, por sot agjencia “Reuters” njofton se ai është anulluar si një shenjë e mesazheve për ulje tensionesh.

Punonjësit e Amazon në Nju Jork organizohen për herë të parë në sindikatë. Ky hap shënon një moment historik për punëtorët e gjigantit të tregtisë elektronike, një kompani që është kritikuar shpesh për abuzimin me të drejtat e punës.

Vendimi për t’u organizuar në sindikata u mor pavarësisht se kompania i ka dekurajuar punonjësit përmes fushatave dhe njoftimeve të herëpashershme.

Gjiganti i tregtisë elektronike, i cili ka me mijëra të punësuar në SHBA, ia ka dalë të pengojë organizime të tilla që prej themelimit të saj në vitet 1990.