Norvegjia do të shtetëzojë pjesën më të madhe të rrjetit të tubacioneve të gazit, kur shumica e  koncesioneve ekzistuese të mbarojnë në vitin 2028. Në një njoftim të premten, Ministria e Naftës dhe Energjisë tha se qëllimi është forcimi i kontrollit mbi infrastrukturën kryesore.

Norvegjia është bërë furnizuesi më i madh i gazit në Evropë, pas rënies së flukseve të gazit rus, të cilin ajo e shpërndan nëpërmjet një rrjeti tubacionesh që shtrihen rreth 9 000 km.

Ministri rus i Mbrojtjes, Sergei Shoigu ka deklaruar nga New Dehli ku ndodhet në kuadër të takimit të Organizatës së bashkëpunimit të Shangait, se Rusia po rrit gatishmërinë luftarake në bazat e veta në Azinë Qendrore. Si shkak për këtë veprim, sipas tij është bërë rritja e pranisë së SHBA në rajon dhe për rrjedhojë, Kremlini e ka parë të arsyeshme që të rrisë gatishmërinë në bazat e veta në Taxhikistan, Kirgizi.

Shefi i BBC-së, Richard Sharp, dha dorëheqjen, pasi një hetim zbuloi se ai kishte shkelur rregullat, duke mos deklaruar se ishte përfshirë në dhënien e një kredie për Boris Johnson, gjatë kohës kur ky i fundit ishte kryeministër.

Më parë, Sharp ka qenë shefi i kryeministrit aktual, Rishi Sunak, në bankën e investimeve Goldman Sachs dhe si donator ka mbështetur konservatorët gjatë kohës kur ata kanë qenë në pushtet.

Kreu i Korporatës Britanike të Transmetimeve emërohet nga monarku i Mbretërisë së Bashkuar, me propozim të qeverisë.

Ka ndërruar jetë në moshën 79 vjeçare moderatori i njohur amerikan, Jerry Springer. Ai është i njohur për shown e tij “The Jerry Springer Show” nisur në vitin 1991 dhe vazhdoi për disa dekada. Me 4000 episode, shfaqja kapi vëmendjen e një mase të madhe të publikut për shkak të realizimit të përballjeve bruto mes personazheve të konflikteve sociale të forta.

Për herë të parë pas 20 vjetësh në pushtet, presidenti turk i druhet humbjes së zgjedhjeve. Sfida elektorale e 14 majit duket se nuk do të jetë aq e lehtë sa paraardhëset. Kandidati i opozitës, Kemal Kiliçdaroğlu, aktualisht kryeson shumicën e sondazheve. Vetë Erdogan tashmë ka njoftuar se kjo ështe hera e fundit që ai kandidon dhe kjo i ka bërë shumë vëzhgues të mendojnë se ai mund të jetë në kërkim të pasardhësit të tij politik.

Një vit më parë, inxhinierët spanjollë krijuan robotin e parë për injektimin e spermës. Testi i parë për efikasitetin e shpikjes së tyre u bë në Nju-Jork, pasi fekonduesi artificial u dërgua me postë nga Barcelona.

Në klinikën New Hope Fertility Center, roboti u përdor për të fekonduar dhjetëra vezë. Rezultati i eksperimentit janë sot dy vajza të vogla.

Në një takim elektoral në zonat e Elbasanit, Damian Gjiknuri, numri dy i Partisë Socialiste, ka vënë në dukje rëndësinë e votës pro PS-së në zgjedhjet lokale të 14 majit, për të shmangur siç u shpreh ai, një votë opozitare që do të prishte bashkëpunimin mes qeverisë dhe bashkisë.

Z. Gjiknuri ka shpjeguar se historia e marrëdhënieve qeveri-bashki kur ka kahe të ndryshme politike në drejtim është negative, pasi ndodh siç u shpreh ai “bashkia kthehet në bunker politik”.

Kërkues nga universiteti i Sheffield dhe Hertfordshire pretendojnë se kanë zbuluar sekretin e Kuasarëve, objekteve më të shndritshme në universin e vëzhguar. Sipas tyre, objektet në fjalë krijohen nga përplasja e galaktikave, duke shpjeguar kështu se pse këto objekte emetojnë ndriçim sa 1 trilionë yje të kufizuar në vëllimin e një sistemi diellor.

Regjisori Steven Spielberg e kundërshton idenë e rishikimit të filmave të vjetër, për t’i përshtatur ata  për audiencën moderne. Në një intervistë për revistën TIME, regjisori i "E.T." dhe "Jurassic Park" tha se regjisorët që marrin përsipër ta bëjnë këtë në fakt po kryejnë censurë.

Spielberg u pyet nëse ka ndonjë film që ai do të dëshironte ta kishte bërë ndryshe, ose nëse do ta ndryshonte sot.

Ai pranoi se rishikimi i E.T., të cilit iu hoqën disa skena me armë, ishte një gabim.

Ministri i Jashtëm rus, Sergey Lavrov, ka lënë të kuptohet se lufta në Ukrainë nuk ka gjasa të mbyllet as këtë vit. Gjatë një konference për shtyp në New York, Lavrov ka deklaruar e në Perëndim po mbizotëron një logjikë skizofrenike. Sipas tij mbështetja masive për Ukrainën në kuadër të “një kundërofensive për të kërkuar mandej negociime me Rusinë” është tërësisht e pambështur.

Ne nuk duam asnjë kërcënim nga territori i Ukrainës dhe këto kërcënime ishin akumuluar aty prej vitesh, sidomos pas grushtit të shtetit në shkurt të vitit 2014