Një ditë pasi KQZ gjobiti kryebashkiakun e Tiranës me 825 mijë lekë për shkelje të rregullave në zhvillimin e aktiviteteve elektorale, kryeministri Rama i ka dalë në mbrojtje.  Rama dhe Veliaj ishin bashkë në Zall-Herr, ku një familje ka hyrë sot në shtëpinë e re të rindërtuar pas tërmetit. Kryeministri tha se gjobat e KQZ-së nuk do e ndalojnë punën e qeverisë.

Një anije kozmike kineze hyri në orbitën e Marsit të mërkurën, në misionin për të çuar atje një rover, i cili do të mbledhë të dhëna për ujin nëntokësor dhe shenja të mundshme të jetës së dikurshme në planetin e kuq.

"Sonda kineze Tianwen-1 hyri me sukses në orbitën rreth Marsit të mërkurën, pas një udhëtimi gati shtatë-mujor nga Toka", njoftoi agjencia kineze e lajmeve, Xinhua.

Një variant i ri i virusit Sars-Cov-2 është zbuluar nga virologët e Universitetit të Milanos. Mutacioni nuk përfshin proteinën Spike të virusit dhe për këtë arsye nuk duket se e ndryshon aftësinë e tij për të infektuar, por është akoma me shumë interes, sepse mund të ndikojë në reagimin imun të trupit të njeriut.

Presidenti turk, Rexhep Tajip Erdogan zbuloi të martën një program ambicioz 10-vjeçar hapësinor për vendin e tij që përfshin misione në Hënë, dërgimin e astronautëve turq në hapësirë ​​dhe zhvillimin e sistemeve satelitore të zbatueshme ndërkombëtarisht.

Erdogan thotë se Turqia planifikon të vendosë "një kontakt të parë me Hënën" në 2023, kur vendi shënon 100-vjetorin e themelimit të republikës turke.

Serbia mban deri tani vendin e parë për avancimin në fushatën e vaksinimit. Falë Kinës, ajo është pararojë në Evropën kontinentale. Rreth 7% e serbëve kanë bërë deri tani të paktën një dozë të vaksinës, një normë më shumë se dyfishi i mesatares aktuale të Bashkimit Evropian, ku midis 3 dhe 4 për qind e njerëzve janë vaksinuar që në fillim të shkurtit.

Ministrja e Drejtësisë Etilda Gjonaj reagoi sot menjëherë sapo u njoftua se Gjykata e Strasburgut rrëzoi ankesën e ish-anëtares së Gjykatës Kushtetuese, Altina Xhoxhaj, e cila pretendonte se rivlerësimi i saj në procesin e vettingut nga organet përkatëse ishte në kundërshtim me Kushtetutën.

Sot kryeministri Edi Rama ka prezantuar para gazetarëve atë që e ka quajtur reform në sistemin shëndetësor. Sipas z. Rama tani nis një projekt pilot i administrimit që ndër të tjera u mundëson mjekëve të jenë pjesë e sistemit publik, por edhe të fitojnë më shumë të ardhura në këmbim të shërbimit ekstra.

Që nga QSUT ne do të fillojmë në formën tjetër të reformës, që është autonomi dhe dhënia mundësisë për mjekët, që mund të jenë jo vetëm shërbëtorë të publikut në spital, por të jenë aty si në pronën e tyre në kuptimin më të mirë të fjalës

Koronavirusi mund të mos e ketë origjinën në Wuhan. Shkencëtarët e OBSH-së po mbajnë sot një konferencë për të hulumtimet mbi origjinën e SARS-CoV-2 në Kinë, gjatë së cilës deklaruan se është “jashtëzakonisht e pamundur” që virusi të ketë dalë nga një laborator dhe kanë kërkuar që të mos studiohet më tej në teori. Në vend të kësaj, Peter Embarek, udhëheqësi i ekipit të OBSH-së, tha që studime të mëtejshme duhet të kryhen nëse virusi është importuar në vend - ndoshta përmes mishit të ngrirë të shitur në tregun në Wuhan, nga ku u zbuluan rastet e para të të infektuarve.

Ajri i ndotur u ka marrë jetën 8.7 milionë njerëzve gjatë vitit 2018. Praktikisht, një në pesë vdekje të ndodhura në 2018 ka qenë për shkak të ndotjes së ajrit nga djegia e lëndëve djegëse fosile si qymyri dhe nafta. Studimi i ri që ka dalë në këtë konkluzion përllogarit që më shumë se një në 10 vdekje në SHBA dhe Evropë janë për shkak të ndotjes. Në Azinë Lindore, ku hyn Kina, gati një e treta e vdekjeve janë për këtë shkak. Shkalla e vdekjeve në Amerikën e Jugut dhe Afrikë ishte dukshëm më e ulët.

Në Kubë, për herë të parë shteti do të zgjerojë hapësirat për hapjen e biznesve private në shumicën e sektorëve. Ky hap që shënon një kthesë të madhe në vendin komunist u njoftua nga ministrja e Punës, Marta Elena Feito, sipas të cilës, lista e aktiviteteve të autorizuara zgjerohet nga 127, në më shumë se 2 000. 

"Puna private vazhdon të zhvillohet dhe është objektivi i kësaj reforme", citon Feiton agjencia e lajmeve,  AFP. Ajo tha se masa do të "ndihmojë në çlirimin e forcave prodhuese" të sektorit privat.