Dy protestues me petka të vjetëruara e të pluhurosura, hypur në një motor papaç kinez, ai mbrapa me një kazëm të ndryshkur në dorë, po kthehen duke sharë e mallkuar me zë të lartë. Nuk merret vesh nëse e kanë me Lulzimin qe s’ka bythë, apo me Ramën qe shkon e ben antimiting në Vlorë siç bëjnë mubarakët e Lindjes së Mesme kur ndjejnë terrenin tu rrëshqasë nën këmbë. Gjithsesi protestuesit janë të zhgënjyer me sa duket, ngaqe qeveria nuk ra as sot.

Protestoni paqësisht!

Kjo thirrje po dëgjohet nga të katër anët në këto orë. Atë e artikulojnë demkat e partisë, analistët militantë, gazetarë që po mbushin dekadën që shkruajnë të kundërtën e asaj që mendojnë, amatorë të Facebook-ut. Por këtë tezë po e riqarkullojnë me forcë dhe këmbëngulje edhe pushtetarët. Zv.kryeministri, kryeministri, ministri i Brendshëm, kryetari i Bashkisë së Tiranës, kryetari i Grupit Parlamentar të PS-së, etj..

Plani i opozitës që protestuesit të futeshin në katin e parë të kryeministrisë për të qëndruar deri në 20 shkurt dështoi.

Berisha ishte për këtë skenar, kurse Lulzim Basha ndryshoi axhendë nga fundi i protestës, për arsye që ai vetë i di më mirë.

Gjithsesi protesta pati edhe momentet e saj të showbiz-it politik të ndërthurura me imazhe të popullit protestues që ecën ndonjëherë me aspiratat e tij duke e jetuar momentin sipas një paradigme që tipizon shqiptarin pamvarësisht kohës dhe situatës në të cilën ndodhet.

Opozita ka deklaruar sot se protesta do të vijojë të enjten. Kështu Monika Kryemadhi, kështu Gazmend Bardhi, kështu edhe Lulzim Basha.

Deri një ditë më parë saj, të gjithë këta deklaronin se nuk po proteston opozita, por populli. Dhe se opozita I shkon nga pas. Ndaj mund të pyesim: ku e dinë këta se kur do protestojë populli sërish?

Ka ndërruar jetë në moshën 77 vjeçare aktori i njohur zviceran Bruno Ganz si pasojë e sëmundjes së kancerit. Ai lindi në Zyrih më 22 mas të vitit 1941 dhe nisi karrierën e aktrimit që në shkollë. Punoi me regjizorë të tillë si Werner Herzog dhe ka si rol më të famshëm Hitlerin në dramën epike, “Rënia”. Ai është i njohur edhe për role të tilla si ai gjyshit në filmin ”Haidi”, por edhe për role në filma si Nosferatu.

Atij ju refuzua një rol në filmin e njohur “Gruaja më e bukur” që i shkoi Richard Gere si dhe “Lista e Shindlerit”.

Për protestën e sotme në Tiranë kanë reaguar edhe ambasada amerikane dhe OSBE-ja. Tam tami është i njohur: rrini mirë, protestoni qetë. Mundësisht merrjani valles para zyrave të Edi Ramës.

Të mos i marrim ambasadat për atë që nuk janë. Shikojeni këtë video të vitit 2014. Është ish-ambasadori amerikan Aleksander Arvisu që shpjegon se përse tha se Berisha është burrë shteti pas ngjarjeve të 21 janarit 2011. Arvisu na thotë se I ka pëlqyer fakti që Berisha nuk organizoi kundër minting.

Socialistët kanë parë sot një kopje të vetes së tyre në vitin 2011 kur protestuan para kryeministrisë me hunj dhe drunj.  Megjithatë ata kanë sot një optikë tjetër mbi protestat dhe demokracinë, duke nisur nga udhëheqësi i tyre që vendosi të mbajë një antimiting alla Erdogan në Vlorë.

Edi Rama me një prani të shtuar të truprojave rrjeshtoi në Vlorë administratën duke nxjerrë në vitrinë Damian Gjiknurin, i cili e vuri veten në anën e shumicës që votohet kundrejt një pakice që sipas tij nuk ka mbështetjen e popullit.

Në Tiranë ka nisur protesta e opozitës e cila ende nuk ka zbuluar drejtimet e saj. Gjëja më e dukshme e saj është prezenca e shtuar skajshmërisht e forcave policore dhe mjeteve të blinduara. Protesta në vetvete është padyshim ngjarja kryesore e ditës së sotme, ndërkohë që kryeministri është në Vlorë për të mbajtur monologun e zakonshëm që nuk thotë gjë dhe as provokon më as për përmbajtjen e vet retorike.