bota

Italia duket se do të ndjekë shembullin e Gjermanisë lidhur me njohjen e gjuhës si kriter i integrimit të të huajve.

Nënsekretarja e Arsimit, Paola Frassinetti, e cila vjen nga radhët e Fratelli d’Italia, partia në pushtet e kryeministres  Giorgia Meloni, deklaroi të premten se ka rënë dakord me ministrin e Arsimit, Giuseppe Valditara, i cili gjithashtu ka theksuar rëndësinë e integrimit të studentëve të huaj dhe ka bërë thirrje për klasa me shumicë italiane. 

Kjo ide është hedhur fillimisht nga lideri i Lega-s, Matteo Salvini, i njohur për qëndrimet e tij antiemigrante.

Shërbimi i Sigurisë së Brendshme Ruse ka arrestuar tre "shtetas të Azisë Qendrore" të cilët po planifikonin një sulm terrorist në Stavropol, në jugperëndim të Rusisë.

Lajmin e bën të ditur RiaNovosti, duke shpjeguar se shërbimet ruse kanë sekuestruar pjesë bombash artizanale dhe produkte kimike në vendin e banimit të tre të arrestuarve.

Evropa ka hyrë në një "epokë të paraluftës" në të cilën çdo skenar është i mundur dhe kërcënimi i luftës nuk është diçka e së shkuarës. Kryeministri polak, Donald Tusk, thotë se me situatën në lindje të Europës "çdo skenar është i mundur".

“Nuk dua të tremb askënd, por lufta nuk është më një gjë e së kaluarës. Është e vërtetë dhe në fakt ka filluar më shumë se dy vjet më parë”, tha Tusk.

Ish-kancelari gjerman, Gerhard Schröder, thotë miqësia e tij me presidentin rus Vladimir Putin mund të kontribuojë në përfundimin e luftës në Ukrainë.

"Ne kemi punuar së bashku mirë për shumë vite. Ndoshta kjo mund të ndihmojë ende për të gjetur një zgjidhje të negociuar, unë nuk shoh ndonjë rrugë tjetër," është shprehur  Schröder në një intervistë për DPA.

Komisioneri i Lartë i OKB-së për të Drejtat e Njeriut, Volker Türk, thotë në një intervistë për BBC se Izraeli mban përgjegjësi të madhe për katastrofën humanitare në Gaza dhe se ka prova të besueshme se Izraeli po e përdor urinë si armë lufte në Gaza.

Türk thotë se nëse provohet, kjo do të përbënte një krim lufte.

Dorëheqja e papritur e ministres së Drejtësisë i ka hapur rrugën një skandali në qeverinë hungareze. Judit Varga, një prej njerëzve më të afërt të Orban, që pritej të drejtonte partinë e djathtë Fidesz në zgjedhjet evropiane dhe një nga emrat më të njohur të politikës hungareze në Bruksel u dorëhoq javën e kaluar.

Përgjatë dekadës së fundit kanë qenë me qindra tragjeditë që kanë përfshirë emigrantët në përpjekje për të arritur brigjet e Europës.

Agjencia e Emigracionit në Kombet e Bashkuara (IOM), përllogarit në raportin e fundit se që nga viti 2014 janë më shumë se 27 mijë njerëz të vdekur ose të zhdukur në ujërat pranë kontinentit të vjetër.

Autoritetet vendore në Tokio kanë lëshuar një paralajmërim për rastet në rritje të një lloji të rrallë, por serioz, infeksioni bakterial.

Rastet e regjistruara janë më shumë se asnjëherë tjetër - 88 vetëm në kryeqytet - 517 infeksione në mbarë vendin, sipas The Japan Times.

Shtetet e Bashkuara, Britania dhe Ukraina janë pas sulmit terrorist në Crocus City Hall, ka thënë për mediat shefi i Shërbimit Federal të Sigurisë së Rusisë (FSB), Alexander Bortnikov.

"Ne besojmë se kjo është e vërtetë. Sido që të jetë, tani po flasim për informacionin faktik që kemi. Këto janë informacione të përgjithshme, por ata kanë një histori të gjatë të këtij lloji", citohet ai nga Tass.

Ish-presidenti i ekstremit të djathtë të Brazilit, Jair Bolsonaro, është strehuar në ambasadën e Hungarisë në Brasilia, kur policia federale i konfiskoi pasaportën dhe i arrestoi dy ish-ndihmës. Ngjarja ka ndodhur muajin e kaluar por është pranuar së fundmi nga avokati i Bolsonaros.

Qëndrimi i Bolsonaro në ambasadën hungareze në 12-14 shkurt u raportua fillimisht nga New York Times bazuar në pamjet e kamerave të sigurisë nga brenda ambasadës.

Kjo ngre pyetje në lidhje me planet e ish-presidentit pasi ai përballet me disa hetime penale në Brazil.