Pafajësia e Arben Frrokut, a kishte dijeni politika për vendimin e Gjykatës së Krimeve të Rënda?

Vendimi i djeshëm i Gjykatës së Krimeve të Rënda për shpallur të pafajshëm, Arben Frrokun, të akuzuarin për vrasjen e komisar Dritan Lamajt, ka qenë i papritur. Të paktën për opinionin publik. Krijohet kjo ide, pasi të gjitha gjasat janë që politika ta ketë ditur, pse jo nxitur vendimin në fjalë. Pa u shtyrë shumë në hamendësime, më e pakta që mund të thuhet është se politika e ka ditur këtë vendim. Ka disa elementë që e provojnë këtë. Së pari, pas vendimit mazhoranca mbajti heshtje, nuk pati deklarata zyrtare as nga PS-ja ehe as nga LSI. I vetmi që ka hedhur dy radhë në Facebook ka qenë ministri i Brendshëm Saimir Tahiri, që akuzon drejtësinë. “Por përtej fakteve konkrete, mungesa e besimit publik te drejtësia sot është më e dukshme se kurrë, dhe aspak rastësisht, e as gabimisht!”, shkruan ai. PD-ja nga ana e vet reagoi dje me anë të Eduart Halimit, por e ka vazhduar sot këtë çështje përmes një shkrimi në gazetën zyrtare “Rilindja Demokratike”. “Gazeta “RD” paralajmëroi 4 javë më parë lirimin e vrasësit të Komisar Dritan Lamajt, Arben Frroku në këmbim të mohimit që vëllai i tij deputet, Mark Frroku do t’i bënte vrasjes së dy deputetëve me porosi të Ilir Metës. Më datën 8 mars, gazeta “RD” publikoi në faqe të parë si lajm kryesor: “Wanted! Mashtrimi i Frrokut, Rama e Meta do i lirojnë vëllanë”, ku shkruhej se, deputeti Frroku ka mashtruar në Prokurori pas seancave të gjata të negocimit me Ramën, Metën dhe Tahirin, të cilët i kanë premtuar se në rast se ai hedh poshtë dëshminë e deputetit Tom Doshi, atëherë vëllai i tij që gjendet në burg për vrasjen e Komisar Lamajt do të lirohet nga burgu”, shkruan “RD”(http://www.rilindjademokratike.com/index.php?option=com_cont...). Dhe shoqëron shkrimin me faqen e parë të gazetës së datës 8 mars. Thënë kjo, pra paralajmërimi i PD-së, që mund të jetë dukur edhe si diversion, bashkë me heshtjen e mazhorancës dhe qetësinë, madje gëzimin e Mark Frrokut gjatë shoqërimit në Gjykatën e Lartë, krijohet dyshimi se diçka mund të jetë luajtur në prapaskenë.
s.z