Një hulumtim për mbajtjen e shamisë nga myslimanet. Shumica mendojnë se duhen mbuluar vetëm flokët, jo fytyra

Shamia e përdorur nga gratë myslimane ka provokuar shpesh debate në Perëndim, sidomos për mbajtjen e tyre në mjedise publike si shkollat. Në fakt shamia dhe mbulimi i fytyrës është një nga ato elementë simbolikë që ndikojnë në forcimin e stereotipave për myslimanët. Gjithsesi një studim i kryer nga Instituti i Hulumtimeve Sociale në Universitetin e Miçiganit në SHBA ka arritur në konkluzionin se shumica e myslimanëve mendojnë se gratë nuk duhet të mbulojnë fytyrën, por vetëm flokët. Gazeta “Koha Ditore” ka sjellë një pjesë nga studimi i cili është përqendruar në shtatë vende të dominuara nga popullsi myslimane si Tunizia, Turqia, Libani, Arabia Saudite, Iraku, Pakistani dhe Egjipti. “Pjesëmarrësve u janë prezantuar gjashtë fotografi me lloje të mbulesave tek femrat (fotografia lartë) dhe ishin pyetur: “Cila nga këto femra është e mbuluar më mirë në përshtatje të vendeve publike?” Shumica e të anketuarve zgjodhën femrën me numrin 4, e cila është ka mbuluar flokët dhe veshët por jo fytyrën. Sauditët preferonin opsionin e dytë, që mbulonte gjithë fytyrën përveç syve të femrës. Por disa nga rezultatet ishin në kundërshtim me praktikat e zakonshme që kanë aplikuar shtetet e tyre”, shkruan “Koha Ditore”. Në një farë mënyre ky hulumtim flet për kontestimin që një pjesë e popullsive myslimane kanë për disa prej zakoneve të mbetura në këto shoqëri. Instituti mendon se këto janë shenja që njerëzit orientohen drejt vlerave të lirisë, duke vëzhguar kështu një proces evoluimi edhe në botën myslimane e parë përgjithsësisht si tejet konservatore.

Më shumë: http://koha.net/?page=1,16,171620

s.z