Komentatorët po heqin shumë për të shpjeguar vizitat e njëpasnjëshme të eksponentëve të politikës shqiptare në SHBA. Pse kaq shumë vizita? Pse në të njëjtën kohë? Janë të ftuar nga dikush në SHBA? Apo janë këta vetë që i kanë bërë të mundura me ndihmën e miqve të tyre? Janë vizita të rëndësishme? Apo janë vizita pa asnjë rëndësi?
Ne të respublica-s kemi mundur të flasim lidhur me këtë çështje me një “burim nga brenda ambasadës amerikane”, dhe ky i fundit hedh pak dritë (jo tërësisht në fakt; nuk ka dashur të thotë më shumë). Burimi na tha se, për të, njëkohshmëria e takimeve është aksidentale, dmth parada filloi me Bashën, e më pas kemi të bëjmë me një garë që të pestë (Basha, Spahiu, Rama, Meta, Berisha) janë duke bërë kundër njëri-tjetrit (vini re: nuk tha ‘me njëri-tjetrin’, por ‘kundër njëri-tjetrit’). Ai (dmth burimi) e përjashtoi versionin, që këto janë vizita të kopsitura nga ambasada amerikane, apo nga ambasadori Arvizu. Ky i fundit thjesht “ka inkurajuar Ramën e Spahiun që të bëjnë një vizitë në SHBA, e të takohen me zyrtarë amerikanë e me njerëz të tjerë”, në mënyrë që të shpjegojnë arsyet e tyre, qëndrimet e tyre, kauzën e tyre, gjë që do të ishte më e mirë se sa “t’i linin këto shpjegime në dorë të raporteve të Ambasadës amerikane në Tiranë”.
Nga komunikimi që patëm me burimin në fjalë, na rezulton se ky “inkurajim ambasadorial për Ramën e Spahiun për të bërë një vizitë në SHBA” është i vetmi kontribut amerikan në këtë festival vizitash. Burimi la të kuptohej, se vizitat në fjalë, të gjitha, janë çalltisje individuale. Sipas tij, aventura amerikane e Lulzim Bashës duhet të ketë pasur për synim prezantimin si një lider me të ardhme në politikën shqiptare (“up and coming leader”, ishte saktësisht termi i përdorur nga diplomati), ndërsa tre të tjerët, Rama, Spahiu, Meta, duhet të kenë patur për qëllim “të qartësojnë keqkuptime të ndryshme që mund të eksiztojnë me ta e për ta në Washington, apo të shpjegojnë pozicione të ndryshme të tyret”.
Sa për Berishën, diplomati amerikan që nuk don të identifikohet tha thjesht që “në dijeninë e tij, Berisha ka planifikuar të bëjë një vizitë në New York për të marrë pjesë në një konferencë të Vatrës, e një vizitë tjetër në Washington në muzeun e Holokaustit, dhe sipas shumë gjasash, njerëzit e miqtë e tij në SHBA janë duke eksploruar mundësitë për takime të tjera.” Dhe po aty lë të nënkuptohet, se “është e natyrshme; është që është në këto dy qytete, pse t’mos bëjë çfarë ka në dorë për të bërë ndonjë takim me zyrtarë amerikanë?”
Kjo është e gjitha. Sipas ambasadës amerikane.
Data sot është 19-05-2013, ora 00:19
29 Mar 2012 - 16:09
28 Mar 2012 - 11:05
Kur u pyet Berisha mbi fajdet në daljen e fundit televizive, ai tha se “se për herë të parë për problemin e firmave piramidale i ka shprehur një shqetësim guvernatori i Bankës, Kristaq Luniku; dhe ka qenë data 17 nëntor 1996”. Na bën me dije pra se pikërisht në këtë datë i është prezantuar ky shqetësim në mënyrë zyrtare.
Është rrenë e hapur. Ne të respublica-s kemi disa dokumenta që provojnë se Berisha, ose vartës të tij, kanë pasur dijeni para kësaj date. Më 25 shtator 1996, ministri i financave Ridvan Bode, ka marrë një letër nga Michael Noel i Bankës Botërore, ku thuhet se “piramidiat shqiptare mbahen më këmbë nga aktivitete ilegale dhe nga pastrami i parave”, dhe se “interesat e larta të pagesave tregojnë se këto firma janë në prag të kolapsit”. Kjo letër i përcillet për dijeni dhe kryeministrit Aleksandër Meksi, këshilltares presidenciale Mimoza Vokshi, dhe guvernatorit Kristaq Luniku.
Ka më. Më shumë se një muaj para kësaj date, më 13 gusht 1996, është një letër tjetër, por kjo është shkruar nga shefi i misionit të FMN-së, Ranjit S. Teja dhe i është dërguar – e gjeni dot kujt? – shkëlqesisë së tij, dr. Sali Berishës. Nënvizoj: data është 13 gusht. Dhe në këtë letër thuhet se “skemat piramidale në Shqipëri po marrin përmasa të rrezikshme”, dhe se “pasojat e kolapsit të tyre do të jenë të shpërndara në të gjithë ekonominë”.
Ca ditë më vonë, më 20 gusht, vetë kryeministri Meksi u ka dërguar shqetësimin e vet Bodes, Lunikut e Berishës, gjë që u zbulua nga një shkrim i publikuar në blogun peshkupaujë.com.
Përfundimi? Ky njeri mbeti duke gënjyer gjithë jetën.
19 Mar 2012 - 11:26
Sali Berisha është i izoluar në pikëpamje ndërkombëtare. U bënë vite që ai nuk është ftuar si kryeministër diku, e nuk ka pritur si kryeministër dikë. Kuptohet, ai ka lëvizur nëpër botë, por fjala është për vizita shtetërore. Dhe ja, krejt papritur, ai bën një vizitë në Hungari. Shih pa shih! Hungaria është vend i rëndësishëm. Si është e mundur që në Budapest presin një Llukashenko të Ballkanit? Ka mundësi, pasi atje është kryeministër një njeri po kaq i izoluar. Quhet Victor Orban, macja e zezë e Europës, që ka shfrytëzuar maxhorancën që ka për të kufizuar lirinë e medias, për të shtënë nën kontroll institucionet shtetërore e publike, e për të ndryshuar kushtetutën mbi bazën e tekave të kësaj maxhorance. Ka pasur një seri kritikash për këtë sjellje, gjë që ka sjellë dhe një izolim të tij. E në këtë kuptim, janë takuar dy të izoluar.
18 Mar 2012 - 16:36
Kryetari Bashkisë është një instancë e pavarur në strukturën e pushtetit në Shqipëri. Ndërsa kryetari i Bashkisë së Tiranës është diçka më shumë. Është i pari mes atyre zyrtarëve shqiptarë që kanë një mandat të qartë popullor; është i pari, pasi për të votojnë dhjetra mijra vetë. Nuk ka një funksionar tjetër, për të cilin të votojnë kaq shumë vetë (kryeministri nuk votohet; votohet partia apo koalicioni i tij). Kjo do të thotë përveç të tjerash se kryebashkiaku i Tiranës nuk mund të marrë urdhëra, e nuk mund të poshtërohet, nga askush. Por kuptohet, nëqoftë nuk e ka emrin Lulzim Basha. Ky i fundit është një vulëhumbur, që s’e ka shokun. Lexoni se ç’leksion e ç’porosi ka marrë, pa bëzajtur ansjë çikë, nga kryeministri Berisha sot: “[Tirana] është një qytet me frymëmarrje perëndimore, nga kreshta e Dajtit, tek kurora e kodrave në perëndim. Gjithçka ka vetëm aromë perëndimore. Pallati i Kulturës përbën një shëmtirë të pamerituar. Eshtë problem madhor për qytetarët e Tiranës. 11 vite të humbura të Tiranës në rrafshin evropian. 11 vite në të cilat vizitorë dhe qytetarë nuk mund të gjejë një vlerë artistike dhe evropiane, përvëç tullave të kuqe.”
Basha ishte i pranishëm; dëgjoi dhe mbajti shënime. Është kryetar i Bashkisë? Është kryetar i ‘leshit me qime’.
16 Mar 2012 - 13:13
Shqipëria është kjo që është, me një mijë e një probleme, dhe kryeministri shqiptar e ka mendjen të organizojë festa. Shikoni se çfarë tha sot, në një mbledhje me drejtues të partisë demokratike: “20 vjetorin e përmbysjes me votën e lirë të regjimit më të egër, me çnjerëzor që kombi shqiptar njohu në historinë e tij. Ky 20 vjetor është i një rëndësie të veçantë sepse e festojmë në kuadrin e 100 vjetorit të pavarësisë së Shqipërisë. Asgjë nga koha e pavarësisë deri më sot nuk ka ndikuar më shumë sesa përmbysja e diktaturës komuniste dhe fakti se e festojmë sot të lirë. 22 marsi është ditë pushimi, por ne do e kthejmë atë në ditën e festës më të bukur. Ju kemi sjellë këtu për t’u angazhuar me të gjithë potencialet e seksioneve, që Tirana të përjetojë atë ditë festën më të bukur në historinë e saj që nga 22 marsi 1992”.
Personalisht e kam bindje: Ky njeri është i sëmurë. Por më të sëmurë janë ata që e dëgjojnë pa bërë zë në këto mbledhje.
19 Shk 2012 - 10:36
“Në orët në vijim do të sqarohet dhe kjo punë”, mbyllnim shënimin tonë të fundit lidhur me veprimtaritë e organizuara nga autoritetet e Prishtinës në Tiranë. Dhe duket se këtë punë e ka sqaruar Shekulli, këtë herë duke iu referuar burimeve me emër e mbiemër. Gazeta e Kokëdhimës ka marrë kontakt nëpërmjet telefonit me zëdhënësin e ambasadës kosovare në Tiranë, Burim Qorrin, dhe nga biseda e bërë me të merret vesh ajo që ka ndodhur. Në njoftimin për shtyp të kësaj ambasade ish lënë të kuptohej se në të dy veprimtaritë ishin ftuar edhe Topi, edhe Rama. Në fakt, saktësimi i tyre shkonte deri tek fraza se “janë ftuar nga ana jonë të gjitha autoritetet më të larta të shtetit shqiptar”, dhe u mendua se ata tek kjo kategori kishin futur dhe Topin, dhe Ramën, ndonëse ky i fundit është autoritet i lartë i politikës dhe jo i shtetit. Por zëdhënësi Qorri, duke iu larguar gjuhës prej qukapiku të njoftimit për shtypin, thotë se në përurimin e ambasadës së re ish ftuar vetëm Topi. “Në përurim nuk është ftuar kreu i opozitës, Edi Rama, për shkak se ambasada ka gjykuar që në të të marrë pjesë një grup i ngushtë njerëzish, ku përfshihen vetëm katër krerët e shtetit, Kryetarja e Kuvendit, Presidenti i Republikës, Kryeministri dhe Ministri i Jashtëm”, ka thënë Qorri.
Shekulli e nxjerr krejt zbuluar zëdhënësin e ambasadës, pasi i rrëzon dhe pretendimin mbi ftesën për kreun e shtetit. “Në Presidencë ka ardhur vetëm një ftesë zyrtare për Presidentin Bamir Topi. Ftesa ishte për veprimtarinë e Sheratonit, ndërsa për pritjen në ambasadë presidenti Topi nuk kishte ftesë”,- thonë burimet zyrtare të Presidencës.
Përfundimisht, shtypi i Tiranës paska pasur të drejtë. Kemi pasur dhe ne të drejtë, kur kemi folur për Thaçin që ka kompleksin e çirakut përballë ustait Berisha. Saktësimi i njoftimit të ambasadës nga ana e zëdhënësit Qorri, sidomos momenti kur flet për “një rreth të ngushtë njerëzish”, nuk lë vend për asnjë ndërdyshje.
9 Shk 2012 - 21:56
Top-channel na bën me dije sot, se “rritja ekonomike e tremujorit të dytë u publikua gati tinëz pikërisht natën e Vitit të Ri”. Po pse tinëz? Çfarë kanë patur për të fshehur? Rritja ekonomike atë tremujor ka qenë vetëm 0,5%, dhe lihet të kuptohet se INSTAT-i ka dashur që kjo shifër afër zeros të eklipsohej nga tollovia e festës së ndërrimit të viteve. Dhe në fajkt, ashtu ndodhi. Për këtë shifër foli pakkush. Ndërsa për faktin që kjo shifër u dha, në kundërshtim me atë që thotë ligji, me tre muaj vonesë, nuk foli askush.
Po rritja në tremujorin e tretë sa është? Ende nuk e dimë. Sipas kalendarit zyrtar (INSTAT-i e ka detyrim ligjor që në fund të vitit të nxjerrë një kalendar me datat e publikimit të të dhënave të ndryshme që kanë të bëjnë me vitin e kaluar), kjo e dhënë duhej të ish publikuar qysh në fillim të këtij muaji. Nuk është bërë, dhe me sa shihet, kjo vonesë po bëhet avaz. Top-channel bën me dije se INSTAT-i nuk e merr mundimin t’i kthejë një përgjigje pyetjes që kanë bërë gazetarët e këtij televizioni i kanë bërë institutit të Ines Nurjas: Nga se vijnë këto vonesa?
Asnjë përgjigje.
1 Shk 2012 - 21:28
Lulzim Basha ka dhënë një intervistë në Zërin e Amerikës, ku bën të qartë qëndrimin e tij lidhur me 21 janarin e vitit të shkuar dhe lidhur me hetimin e gjykimin e kësaj çështjeje; dhe me siguri, shumë demokratë (anëtarë të PD-së) që e kanë lexuar me vëmendje, mund të kenë pyetur veten: Është çmendur ky njeri? Për dy arsye. Së pari ai flet me një ton ex cathedra, me një ton gati-gati presidencial; me fjalë të tjera, flet si një njeri që është larg palëve në konflikt, ose mbi palët, dhe u jep mend këtyre të fundit: “Protagonistët e kësaj ngjarjeje duhet të marrin përgjegjësitë e tyre në raport me ngjarjen dhe qytetarët, në kuptimin e përmbushjes së 12 prioriteteve të BE. Të vendosim interesat e qytetarëve mbi ato partiake dhe të bashkëpunojmë. Këtë na e ka thënë Brukseli dhe ma kërkoi edhe Washingtoni gjatë qëndrimit tim këtu. Rruga evropiane e Shqipërisë do të thotë së pari një sjellje europiane për të gjithë aktorët politikë. Kjo fillon me pranimin e aktorëve të lojës. Asnjë motivim personal nuk duhet të ndërhyjë në rregullat e shtetit ligjor”.
Së dyti, Lulzim Basha është i pari dhe i vetmi nga maxhoranca që guxon të përmendë viktimat nga një optikë neutrale; guxon t’i nënvizojë në fillim fare, kur flet për atë ngjarje, e pastaj përmend dhunën ndaj institucioneve; guxon më në fund t’i quajë “të pafajshme”. Rrjedhimisht për Lulzim Bashën atë ditë janë vrarë katër njerëz të pafajshëm. Në rrethana të tilla, prokuroria ka për detyrë të gjejë autorët e krimit.
Lulzim Basha paska bërë seanca egzorçizmi në SHBA.
31 Jan 2012 - 13:50
Të huajt, që ftohen të marrin pjesë në një veprimtari, shoë, koncert, seminar a forum në Tiranë, e që e kanë për herë të parë që vënë këmbë në këtë vend, nuk duhen cytur të flasin për punët tona; sepse është e sigurtë që do flasin gjepura. Doni një provë? Personazhi i televizionit italian, Platinette, ish ftuar nga Adi Krasta në show-n e vet në Pallatin e Kongreseve, dhe aty foli për Tiranën që ai e kish parë rrugës duke ardhur nga aeroporti e që e kish kqyrur gjatë një shetitjeje një a dy orëshe. Dhe ish mahnitur nga fakti që Tirana ish një qytet i pastër, ku syri nuk të sheh plehra, dhe ku shiten libra në trotuar (m’u duk vetja në Parisin e viteve më parë, tha Platinette)!!!!
Me t’u kthyer në Itali, nuk i ka rezistuar dot ‘tundimit’ për të folur sërish lidhur me Shqipërinë në një program televiziv, atë të drejtuar nga Piero Chiambretti. Dhe aty tha se “ish befasuar nga Shqipëria, pasi atje qeverisnin në koalicion të majtët e të djathtët, gjë që kish krijuar një situatë të mirë për qytetarët; në Itali as që mund të mendohet që të ngrihet një koalicion qeverisës mes të djathëts e të majtës”. Dhe në fund, duke shtënë në punë, dhe duke e vënë në lojë, cliche-në e shqiptarëve ‘të pagdhendur’, u shpreh me siguri: “Prandaj, shqiptarë jemi ne, nuk janë shqiptarët”.
26 Jan 2012 - 15:50
Një deputet i PDK-së, Bekim Haxhiu, ka kërkuar nga Albin Kurti të hedhë dritë mbi ca fakte, që e nxjerrin vetë Kurtin si bashkëpunëtor të serbëve. Duket si gallatë e numër estrade, por nuk është; përkundrazi, gjithçka ka ndodhur në seancën e sotme të parlamentit të Kosovës, Deputeti i PDK-së ka marrë fjalën dhe ka thënë: “Z. Kurti, është mirë të sqaroni takimin tuaj me serbët në Klinë. Policia e Kosovës në vitin 2004 ju ka ndaluar me një makinë së bashku me disa serbë, ndërsa në bagazhin tuaj kishte dokumente dhe shishe të verës Suxhuk e gjëra tjera ushqimore. Dua që t’u sqaroni qytetarëve të Kosovës qëllimin e këtij takimi. Ishit për piknik me serbët?”
Sipas Zërit, më pas deputeti Haxhiu ka thënë se Kurti, pas lirimit nga burgu i Serbisë, ka vazhduar të mbajë kontakte me një grua serbe në Prishtinë, dhe e njëjta grua e ka vizituar edhe në burgun e Serbisë. “Më datën 28 shtator 2011 përmes autobusit të linjës Beograd – Prishtinë ju keni marrë një korrespodencë me pako në zarf (këtë e ka pranuar Dardan Mulliqaj), e dedikuar për ju në stacionin e autobusëve në Prishtinë, andaj do të ishte mirë që t’i sqaroni qëllimet dhe përmbajtjen e këtij zarfi që ta ka dërguar vajza e njërit prej ministrave të Millosheviqit”, ka shtuar ai, duke dhënë garanci se ka dëshmitarë që mund t’i provojnë këto që ai thotë.
Duket e pabesueshme, në fakt. Në gjithë botën shqiptare ka boll shenja të prapambetjes së ububushme kulturore, dhe një përçartje e tillë publike është një nga këto shenja, por të vjen çudi se si s’ka dalë askush nga brenda PDK-së për ta shkurajuar deputetin në fjalë, që po bëhej gati të këpuste mufka të tilla. Apo ka ndodhur e kundërta, dmth ka pasur plot që e kanë inkurajuar?
- « e para
- ‹ paraardhëse
- 1
- 2
- 3
- 4
- 5
- 6
- 7
- 8
- 9
- në vazhdim ›
- e fundit »
