Paradoksi shqiptar, në botë çmimi i naftës bie, te ne ngrihet. Demokratët i bëjnë thirrje qeverise të heqë taksën e qarkullimit e kështu të ulë çmimin e naftës

Në botë çmimi i naftës ka rënë, në Shqipëri është ngritur. Një paradoks i përhershëm. Por lajmi i uljes së çmimit në botë përcillet me gëzim,por  dëshpëron shqiptarët. Kjo për shkak se çmimi i naftës vetëm po rritet dhe ka arritur në nivelet që ishte kur nafta kishte kapur rekordin në bursa. Ndërkohë Partia Demokratike i bëri jehonë këtij shqetësimi me një deklaratë për shtyp të shtunën. “Çmimi i naftës ka arritur deri në 190 lekë litri, më i shtrenjti në rajon e më gjerë, duke ndikuar në shtrëngimin edhe më tej të jetesës. Ndërkohë, Edi Rama vazhdon me kokëfortësi te mbaja taksat e rritura mbi qarkullimin duke refuzuar të ulë kështu çmimin e naftës. Shqipëria është i vetmi vend që çmimi i naftës vazhdon të rritet ndërkohë që prej dy vitesh nuk rriten me asnjë qindarkë pagat e pensionet. Nga këto tarifa e çmime skandaloze po përfitojnë miqtë dhe klientët e qeverisë, që pasurohen çdo ditë në kurriz të qytetarëve. Partia Demokratike i bën sërish thirrje qeverise të heqë taksën e qarkullimit dhe të ulë kështu çmimin e naftës e të lehtësojë jetën e shqiptarëve,” tha deputeti demokrat, Gerti Bogdani.

Agjencia Ndërkombëtare Energjetike paralajmëron sërish se çmimet e naftës do të vazhdojnë të bien. Për më tepër agjencia thotë se çmimet e naftës do vazhdojnë të jenë shumë të ulëta edhe në vitin 2016. Sipas IEA, tregu i naftës në botë nuk është në gjendje që të absorbojë të gjithë volumin e madh të naftës së prodhuar. Çmimi i një fuçie naftë ishte 115 dollarë në qershor të vitit të shkuar dhe ra deri në 45 dollarë në janar. Aktualisht një fuçi naftë në bursë kushton 59 dollarë.