Ngjela denoncon emra të Sigurimit, veçon Nevzat Haznedarin: Mund të jetë vrasësi i matematikanit Raqi Qirinxhi

Në librin e tij të hedhur së fundmi në treg “Përkulja dhe rënia e tiranisë shqiptare, 1957-2010”, ndër të tjera Spartak Ngjela ka publikuar disa emra. Emrat janë të dy kategorive: emrat e të burgosurve-spiunë në burgjet politike dhe emrat e hetuesve të Sigurimit. Ngjela thekson në mënyrë të veçantë, njërin prej tyre, të quajtur Nevzat Haznedari. Shkruan Ngjela ndër të tjera:

“Sipas të gjitha dokumentave që gjenden në dosjet e hetuara nga Sigurimi i Shtetit nuk ka patur asnjë grup ose individ të rëndësishëm që ka kaluar nga hetuesia politike e Sigurimit e të mos ketë patur brenda vetes shenjën ‘Nevzat Haznedari’. Ka qenë manipulatori më i paskrupullt i hetimeve të Sigurimit derisa vdiq në mënyrë enigmatike mu në mes të rrugës.  Nga shumë burime, familjes Qirinxhi  i rezulton se ka shumë mundësi të ketë vrarë prapa krahëve Raqi Qirinxhiun matematikan i shkëlqyer dhe njeri shumë i ditur që kishte mbaruar studimet shkëlqyer në Francë. Haznedari është në fakt një simbol i terrorit në Shqipëri dhe kundrejt tij mendoj se do të vijë koha që të bëhet një hetim i imët për të nxjerrë në pah aktivitetin e tij në “vërtetimin” e grupazheve që pillte nga mendja Enver Hoxha. I mbajtur afër nga Haznedari rezulton të jetë Kristofor Mërtiri, janë nga një zonë, Leskoviku…” (A.N.)