Bizneset punojnë nën kapacitete, drejtuesit shprehen se do t’i përballojnë kufizimet financiare me kredi bankare

Ekonomia vijoi të punojë nën kapacitetet e veta edhe në tremujorin e dytë të vitit, raporton “Tv Scan” në një kronikë të trasmetuar prej tij. Sipas vrojtimit të Bankës së Shqipërisë, shumica e sektorëve ekonomikë vazhdojnë të veprojnë nën potencialet e tyre, ndonëse me tendenca të ndryshme. Duket se ecurinë më të mira gjatë tremujorëve të fundit po e shfaqin industria dhe shërbimet, ndërsa tregtia dhe ndërtimi po veprojnë nën mesataren afatgjatë të shfrytëzimit të kapaciteteve. Shfrytëzimin më të dobët të kapaciteteve në ekonomi vazhdon ta ketë shfaqë sektori i ndërtimit. Norma e shfrytëzimit të kapaciteteve në ndërtim shënoi 60.1 % në tremujorin e dytë, duke qëndruar rreth 4.4 pikë përqindje nën mesataren e saj historike. Bizneset u shprehën se faktorët me ndikim kryesor në nivelin e shfrytëzimit të kapaciteteve janë kërkesa e pamjaftueshme dhe kufizimet financiare. Në masën më të madhe, bizneset janë shprehur se do t’i përballojnë kufizimet financiare me kredi bankare dhe një pjesë me porosi me parapagim.