“Rreziku anglo-amerikan për Shqipërinë”, plagjiaturë! Nuk e ka shkruar Enver Hoxha, por e kanë “klonuar” një grup autorësh

Në numrin e vet të djeshëm, Gazeta Panorama ka sjellë në vëmendje botimin e librit “Tjetërsimi i veprës intelektuale gjatë komunizmit në Shqipëri (1944-1990)” të autorit Leka Ndoja. Në këtë libër hulumtues sillet edhe fakti sesi një nga veprat më të mira të Enver Hoxhës, “Rreziku anglo-amerikan për Shqipërinë” (Tiranë, 1981) është në të vërtetë një plagjiaturë e një vepre të Alqi Kristos, që nuk u botua kurrë për të mos “i hedhur hije” klonit të vet. Sipas gazetës Enveri nuk e ka “vjedhur” vetë, por e kanë bërë një grup autorësh që pas shfrytëzimit të materialeve të përkthyera nga misionet angleze prej Alqi Kristos, me gjasë i shtonin ndonjë koment ose vinin në lojë qëndrimin e anglezëve ndaj shqiptarëve dhe ndaj luftës në përgjithësi.

Shkruhet në libër:

[Alqi Kristo] ka dorëzuar në shtëpinë botuese “8 Nëntori” një dorëshkrim 800 fq. në mes të viteve ’70, të titulluar “Shpartallimi i organizatave tradhtare gjatë luftës Nc.Çl”. Në këtë vepër me titull të çuditshëm, merren në analizë dhe shfrytëzohet fondi i botimeve në Perëndim, kryesisht nga anglishtja, i autorëve protagonistë gjatë Luftës Botërore në Shqipëri, të autorëve anglezë David Smajli, Margaret Hasluck dhe G j e n e r a l i t Deivis (Edmund Frank Davies), gjatë misioneve të tyre në shërbim të vendit të vet dhe në çlirimin e Shqipërisë nga nazifashistët. Nisur nga indikacioni i redaktorit të sh.b. shoqërore politike “8 Nëntori”, Petrit Bezhani, arritëm të identifikojmë në AQSH titullin e veprës së pabotuar të Alqi Kristos dhe planifikimin e botimit të saj. Ky studim është dorëzuar disa vjet përpara veprës “Rreziku anglo-amerikan”. Kështu është shfrytëzuar nga zyra e shtypit të Komitetit Qendror për përgatitjen e veprës së Enver Hoxhës, “Rreziku anglo-amerikan për Shqipërinë”, që u botua si klon i veprës së Alqi Kristos në 1981-shin.

Vepra e Kristos, shkrimtar dhe përkthyes, “pas zvarritjeve trevjeçare, më së fundi u vendos në planin e botimit të shtëpisë botuese “8 Nëntori” në 1982-shit. Edhe ky parashikim për t’u botuar në vitin 1982, me tirazhin 6 mijë kopje, u bllokua për të mos u botuar kurrë...”

k.c.