I gjithë populli ushtar! Histeri kolektive në mbështetje të luftës së Erdogan (Video)

Një histeri kolektive ka mbërthyer Turqinë pas nisjes së operacioneve të luftës në Siri. Të gjithë po nxitojnë të deklarojnë mbështetjen e tyre për vendimet e Erdoganit, duke përshëndetur ushtarakisht.

Që nga fëmijët e vegjël, sportistët dhe zyrtarët e lartë janë shfaqur duke nderuar me përshëndetje ushtarake, në paraqitjet publike. Kësaj liste të gjatë i’u  shtua edhe ministri turk i Mbrojtjes, Hulusi Akar. Gjatë vizitës së tij në shkollën ku u diplomua, studentët e pritën me përshëndetje ushtarake. Siç tregohet në videon e mëposhtme, kur ministri hyri në dhomë, të gjithë studentët u ngritën në këmbë, e përshëndetën ushtarakisht dhe kënduan himnin e shkollës.

Në fjalën e tij, Hulusi Akar theksoi rolin e rëndësishëm të arsimit. Ai gjithashtu iu referua çështjes së disiplinës, duke thënë se disiplina është e nevojshme kudo, jo vetëm në ushtri, ndërsa këshilloi studentët të kujdesen për lidhjet familjare. I pyetur nga një student për operacionet në veri-lindje të Sirisë, Akar u përgjigj se "siguria dhe interesat e vendit janë jetike. Në këtë kontekst ne nuk do të lejojmë asnjë rrezik dhe kërcënim për kufijtë tanë dhe njerëzit tanë në jug të vendit ".

Fillimisht ishin futbollistët e Kombëtares së Turqisë që në ndeshjet e Evropianit me Shqipërinë dhe Francën bënë këtë gjest. Përshëndetja ushtarake ka marrë një dimension histerik, ku sportistë të garve të ndryshme tregojnë solidaritetin e tyre me politikën e Erdoganit. Së fundmi edhe në Kosovë, fëmijë të një shkolle në Prizren përshëndetën ushtarakisht duke mbajtur flamurin turk.