Ditë e re, gënjeshtra të vjetra. Ku është padia për Bjarke Ingels, z. Basha?

Sot kryetari i Partisë Demokratike, Lulzim Basha, shkruan në faqen e vet në Facebook:

Projekti i teatrit kombëtar është projekt kriminal grabitqar. Ai ka vetëm një qëllim: grabitjen nga Rama të dhjetëra milionave euro. Njësoj si projekti i stadiumit, ku Edi Rama është pronari i vërtetë i gjysmës tij. Njësoj si projekti i unazës ku Edi Rama do vjedhë miliona euro. Një hajdut psiqik që nuk ngopet pa vjedhur të gjithë Shqipërinë.

Dua t’i them troç çdo arkitekti të huaj e vendas, çdo funksionari, çdo drejtuesi nga më i parëndësishmi tek Edi Rama se do të përgjigjen para drejtësisë për këtë korrupsion masiv dhe krimin që po i bëjnë pasurive dhe parave publike.

Atyre që mendojnë se do të ndërtojnë, dua t’ju them se ndërtimi do të jetë burgu i tyre. Dua t’u them qartë: gropa që mendojnë se do të hapin në truallin e teatrit do të jetë gropa e tyre

Çfarë do të thotë kjo në terma konkretë? A mundet të tremebt dikush që po ndan 200-300 milionë euro nga një status i tillë? A mund të zbythet një kryeministër nga fjalët e dikujt të cilin e menaxhon si do për çdo projekt që ka kaluar? Sigurisht që Jo. Zoti Basha do të besohej pakëz më shumë nëse do të mbante fjalën që ka premtuar për përgatitjen e një padie ndaj arkitektit Bjarke Ingels. Lexoni se çfarë deklaronte ai pak muaj më parë:

Për Bjarke Ingels po përgatitet një padi penale. Po përgatitet gjithçka dhe në Prokurorinë belge. Dhe mbi çdo blerësi që po merr pjesë në këtë krim monstruoz

Kjo në datën 27 korrik të vitit 2018.

Në muajin tetor 2018, kryetari i PD-së kishte këtë qëndrim:

PD nuk ka hequr dorë nga padia, por kallëzimi do të varet nga hapat që do të bëhen nga qeveria për Teatrin

Sot jemi në kushtet kur qeveria po përparon konkretisht në këtë drejtim, me akte administrative, zbrazje godine dhe ngritje grupi pune dhe negociim kontrate. Zoti Basha vazhdon me kërcënimin se një ditë ai do bëjë qametin. Këtë premtoi edhe z. Rama, mirëpo kur I erdhi zogu në dorë doli e tha se drejtësia është e kapur, ndaj prisni pak sa ta reformoj. Zoti Basha e kundërshton këtë lloj reformed he me gjasë ai nesër do thotë se duhet pastruar drejtësia nga të kapurit, ndërkohë që si stadiumi, si konçesionet, ashtu edhe Teatri do të jenë përfunduar. Si vallë nuk ka frikë kush nga z. Basha dhe kredoja e tij morale? Si ka mundësi që asnjë biznesmen nuk i tutet një opozite që premton se do vërë ligj dhe shtet?

Ka vetëm një përgjigje: Tepsia vazhdon. Ajo ka brenda në tavë të gjithë, pavarësisht Teatrit të shëmtuar që na serviret përditë.