Rikthehet revista MAPO, tani si e përmuajshme

Rikthehet revista MAPO, një e përjavëshme që tani vjen si e përmuajshme, e konceptuar sipas redaksisë së re si “revistë leximi”. Në numrin e parë kopertinën e zë Arian Çani i Zonës së lirë, i etiketuar me titullin e madh “Djalli që na ndjek të premten”. Ndër risitë e revistës mund të përmenden organizimi në columns në vend të komentariatit tradicional dhe kjo risi vjen e mbështetur në emra të njohur të medias si Mark Marku, Sokol Balla, Henri Çili, por edhe nga akademikë si Ardian Ndreca e Ardian Civici. Me kolumnat e tyre vijnë edhe Iva Tiço, Shkëlzen Maliqi e Alfred Lela. Revista sjell edhe ‘Dorëshkrim’ që është në fakt një fragment libri i pabotuar në shqip dhe do të jetë një prej rubrikave fikse të MAPO-s. Në këtë numër vijnë kujtimet e Mbretreshës Geraldinë për momentet e fundit te koka e shtratit të vdekjes së mbretit Zog, një biografi e autores britanike Gwen Robyns. “Historia me foto” sjell momente nga vizita e Hrushovit në Shqipëri shoqëruar me kujtimet e këtij të fundit. Një tjetër prurje interesante është “Nëse unë do të isha kryeministër”, një mini-quiz të cilit i përgjigjet Blendi Kajsiu, politologu që thotë se nëse do të okuponte karrigen e shefit të qeverisë do të preferonte si kryeparlamentar Fatos Lubonjën e si President Besnik Mustafajn. Edhe “Pa shumë fjalë” nëpërmjet së cilës fotografi Armand Sallabanda kap me aparatin e tij një moment artistik i shton hijeshi numrit të parë. Revista ka 100 faqe e kushton 300 lekë.

H.B.