Shqiptarët mund të lëvizin lirisht në zonën Schengen, por ata parapëlqejnë Britaninë

Në një artikull të së përditshmes britanikes Daily Express, thuhet se, para se shqiptarët të përfitonin nga liberalizimi i vizave, gjatë vitit 2010, oficerët e emigracionit britanik kapnin rreth dy emigrantë të paligjshëm shqiptarë në javë.Ndërsa, pasi dyert e zonës Schengen janë hapur, emigrantët e kthyer në periudhën korrrik-shtator 2011 janë 229; kuptohet, nuk është ndonjë shifër kushedi se çfarë, por në vlerë krahasimore rritja është e jashtëzakonshme; është më e madhe se 800 përqind.

Sipas një studimi të Frontex-it, Agjencia Europiane e Kufijve, në të njëjtën periudhë rreth 3.550 shqiptarë u kthyen nga të gjitha vendet e Bashkimit Evropian,  një rritje me shtatëfish krahasuar me një vit më parë. Me këtë rast, e përditshmja Daily Express nuk ka mundur t’mos nënvizojë se bandat shqiptare kontrollojnë rreth 75% të shtëpive publike në Britani, dhe se bandat e tyre janë të implikuara në trafikun e heroinës, rrëmbimit dhe grabitjeve në rrugë. Këto detaje dalin një javë pasi BE hapi bisedimet mbi liberalizimin e vizave për Kosovën, gjë që të bën të mendosh se shqiptarët e Kosovës hyjnë të penalizuar nga ky imazh, apo nga këto të dhëna, në këto negociata.

Re.Pu.