Dokumentet e deklasifikuara: Përpjekja e SHBA për të vrarë Raul Kastron në 1960

CIA nuk ka pasur në shënjestër vetëm Fidel Kastron, por edhe të vëllain, Raul. Në vitin 1960, Raul Kastro është bërë udhëheqësi i parë i revolucionit kuban, për të cilin CIA hartoi një plan eliminimi. Kundrejt 10 000 dollarëve u pajtua një pilot, i cili do ta merrte vëllain e Fidelit nga Praga në Havana, rrugë gjatë të cilës do të ndodhte një "aksident". Plani që nuk arriti kurrë të finalizohej zbulohet nga dokumentet e deklasifikuara, të botuara së fundmi nga Arkivi i Sigurisë Kombëtare në Uashington.

Piloti Jose Raul Martinez, i cili ishte rekrutuar nga CIA, kishte kërkuar në shkëmbim dhe arsimimin në kolegj për dy djemtë e tij nëse ai do të vdiste gjatë operacionit.

Megjithatë, pasi Martinez u nis për në Pragë, selia e CIA-s në Shtetet e Bashkuara vendosi të anulonte misionin. "Braktisni planin" lexohej në një mesazh dërguar në Havana. Sidoqoftë, ky mesazh nuk u mor kurrë nga Martinez.

 Sidoqoftë, ai vetë nuk e zbatoi detyrën që i ishte ngarkuar: pasi u kthye në Kubë, ai i tha kontaktit që bënte lidhjen me CIA-n nuk i ishte dhënë mundësia për ta shkaktuar aksidentin.

Historia, megjithatë, hedh dritë të re mbi "një të kaluar të errët dhe të keqe në operacionet e SHBA-ve kundër revolucionit kuban", i tha AFP-së Peter Kornbluh, analist në Arkivin e Sigurisë Kombëtare, raporton ANSA. "Ndërsa epoka e Kastros përfundon zyrtarisht, politikanët amerikanë kanë mundësinë të lënë pas këtë bagazh historik dhe të angazhohen në të ardhmen e Kubës pas Kastros."

 Vetë Fidel Kastro ka sfiduar 11 presidentë amerikanë dhe u mbijetoi komploteve të shumta për ta vrarë, 638 të tilla sipas Librit të Rekordeve Guinness, si dhe përpjekjes së dështuar të zbarkimit amerikan në Gjirin e Derrave 60 vjet më parë.