Virusi gjunjëzoi turizmin, dëmi sa 11-fishi i krizës së recesionit

Sektori që pandemia ka dëmtuar më shumë është turizmi. Në rang global, dëmet arrijnë një shifër rekord. Sipas një raporti të Organizatës Botërore të Tregtisë, gjatë vitit 2020, sektori i turizmit në nivel botëror humbi plot 1.3 trilion dollarë, për shkak të kufizimeve të udhëtimit që imponoi Covid-19.

Shifra është 11-fishi i humbjeve që u regjistruan gjatë krizës ekonomike globale të vitit 2009 dhe korrespondon me një rënie prej 74% të mbërritjeve të turistëve në botë krahasuar me vitin 2019, thuhet në një deklaratë të agjencisë së Kombeve të Bashkuara.

Kriza ka vënë në rrezik 100-120 milionë vende pune në këtë sektor, shumë prej të cilave në ndërmarrje të vogla dhe të mesme.

Në mënyrë të veçantë, Evropa regjistroi një rënie prej 70% të hyrjes së turistëve, pavarësisht një ringjalljeje të vogël dhe jetëshkurtër në verën e vitit 2020. Rajoni pësoi rënien më të madhe në terma absolutë, me mbi 500 milionë turistë ndërkombëtarë më pak në vitin 2020. Dy Amerikat përjetuan një rënie prej 69% në udhëtimet ndërkombëtare, ndërsa situata u përmirësua disa në tremujorin e fundit të vitit.

Edhe parashikimet e Organizatës Botërore të Turizmit janë të zymta. Shumica e ekspertëve nuk shohin kthim në nivelet para-pandemike përgjatë dy viteve të ardhshme. Ata parashikojnë se viti 2023 do të jetë një pikë kthese. Projeksionet e OBT-së janë për një rikthim të turizmit në nivelin e vitit 2019 vetëm në vitin 2024.