Zgjidhjet autoktone shqiptare/Nga "i vrarë padrejtësisht" në "humbje jete aksidentalisht"

Postuar në 14 Dhjetor, 2020 22:50
Skerdilajd Zaimi

 

Vdekja e Klodian Rashës ishte tragjike, pavarësisht rrethanave. Rebelimi huliganesk që pasoi ishte një karikaturë karagjozësh, ndërkohë që vendimi i sotshëm i qeverisë shqiptare për të akorduar një pension të posaçëm për familjen e tij, bazuar në ligjin për sigurimet shoqërore, është drama e vërtetë e kësaj shoqërie.

Përkufizimi në vendimin e Këshillit të Ministrave i asaj që ndodhi është përtej çdo norme logjike:

humbi  jetën  aksidentalisht,  si  pasojë  e  veprimeve policore

Pra nuk kemi vrasje, kemi një humbje jete Aksidentalisht – si pasojë e veprimeve policore. Mbi cilin raport zyrtar Këshilli i Ministrave bën këtë kualifikim të ngjarjes? Sigurisht mbi llafet e hedhura lart e poshtë dhe nga këqyrja e vendit të ngjarjes nga policia. Po hetimi penal që ka nisur çfarë vlere ka? Po nëse prokuroria konstaton se personi mund të ketë kundërshtuar punonjësin e policisë?

Pyetjet janë të shumta, por vendimi tanimë është marrë dhe ai na tregon jo vetëm stresin ku ndodhet kryeministri, por edhe monetarizimin e dinjitetit në këtë vend. Ndoshta ka qenë kështu përherë dhe ne kemi keqkuptuar historinë e identitetit tonë. Për ta kuptuar mirë se çfarë do të thotë ky lloj kualifikimi me një akt normativ administrativ si VKM le të ecim pak në kohë. Ditën e dorëheqjes nga detyra, ministri i Brendshëm, Sandër Lleshaj do të deklaronte ndër të tjera se kishim të bënim me:

...një djali të ri, të vrarë padrejtësisht nga një punonjës policie

Si evoluoi kështu kualifikimi zyrtar i të njëjtës ngjarje që i kushtoi vendit një jetë njeriu, një dorëheqje ministri dhe një pension të posaçëm? Këtë mund ta dijë vetëm një njeri që quhet Edi Rama, i cili vepron këtu identikisht si paraardhësi i tij në Gërdec.

Ky nuk është rasti i parë. Pak vite më parë ndodhi që një helikopter i ushtrisë të rrëzohej dhe dy pilotë të humbisnin jetën. Brenda po asaj dite Ministria e Mbrojtjes akordoi statusin e dëshmorit, prej nga ku rrjedh trajtimi financiar për familjet. Tri ditë më pas, prokuroria nisi hetimet për shkelje të rregullave të fluturimit, çka vendoste në diskutim të gjitha masat e marra. Pse atëherë nuk dha dorëheqje ministrja? Pse nuk u largua ajo nga detyra?

Si vallë u shitka dhe bleka kaq kollaj gjaku në këtë vend ku rron e prosperon një popull me tradita të shquara të lirisë?

Kujtoni sesi para disa vitesh, kur ministër i Transporteve ishte Edmond Haxhinasto, një aksident tragjik që i mori jetën fëmijëve të një familjeje, për shkak të një devijimi të paligjshëm të rrugës drejt një karburanti, u mbyll. Si mundet prindërit të bëjnë këtë Pazar me të ndjerët? 

Kjo ndodh në Shqipëri, në këtë vend interesant ku në mënyrën më të pabesueshme mileti e kërkon moralin nga qeveria, pa u kujtuar se e ka harruar dhe shkelmuar atë më brutalisht se ndonjëherë. E kur blihet gjaku kështu – term i huazuar nga ish-kryeministri Sali Berisha që e quan VKM-në zgjidhje kanunore – e marrim me mend sesa shpejt mbyllen gojët që edhe kur hapen, llapin për ndonjë kockë. Autoktonë të vërtetë dhe të pakopjueshëm.

Comments

Submitted by Aqif (not verified) on

Ky shtet, qe me veprimet e shemtuara policeske po ia kalon edhe regjimeve fashiste apo atij "aparteid" te Frances nen regjimin e diktatorit xhuxh Makaron, nuk e ka pwr turp e as per here te pare qe te fsheh krimet e tij.
Gjenerali katofashist Sander Leshaj, qe e barazpeshon veten e tij me fashistin prift katolik Pater Harapin, e inaguroi punen e tij me vrasjen makabre duke i zene pusi grekut etnik Kostandinos Kacifas (u prehte je paqe) kur, ky i fundit as qe nuk kishte nder mend te vriste polic, se po te donte, i kishte vrare kur ata i kishte perballe kafese qe po pinte.
Akoma sot e kesaj dite, vrasja e te ndjerit Kacifas trillohet dhe mbulohet me pluhurin e nacionalizmit shterpist shqiptarist, qe eshte shterp nga civilizimi dhe i mbarsur me debilizma dhe skizofreni.
U prehshin ne Paqe dhe Allahu i Madherueshem ua lehtesofte dheun Rashes dhe Kacifas, ketyre djemve te pafajshem qe nenat nuk i kane sot.

Add new comment

Plain text

  • No HTML tags allowed.
  • Web page addresses and e-mail addresses turn into links automatically.
  • Lines and paragraphs break automatically.