Të mësojmë të gjithë nga shembulli i Ardit dhe Zaidës
Drejtori i Përgjithshëm i Policisë, Ardi Veliu, ishte sot lajmi i ditës. Ai u shfaq në një foto me qytetaren Zaida Çobo, të cilën e përgojoi në Komision Parlamentar e të cilës i ka kërkuar falje. Më vonë Çobo deklaroi se do të tërhiqte edhe padinë, sepse siç citohet të jetë thënë ajo “jemi njerëz mbi të gjitha".
Në fakt dinjiteti i njeriut e kërkonte që Ardi Veliu të ishte shkarkuar me turp për uniformën që mban. E kundërta ndodhi: ai sot u bë heroi i ditës me ndjesën e thellë që ia imponon qytetaria e kurdisur nga një operacion i vockël marketingu pas së cilit qëndron kryeministri.
Nuk kemi pse çuditemi; nuk është hera e parë që shqiptarët tregohen kaq liberalë me dinjitetin. Kujtoni Gërdecin, 21 janarin, aksidentin e Kavajës për të kuptuar se politika arrin përherë ta gjejë gjuhën me familjarët e viktimave.
Kështu edhe kësaj radhe, aq më tepër që Veliu nuk bëri ndonjë gjë të madhe: u mor me llafe. Po edhe puna që bën këtë ka në thelb: të përgojojë në kritere profesionale dhe me prova qytetarët. Ndryshe kjo quhet për konveniencë: përgjegjësi penale.
Ndaj Veliu është aty ku duhet të jetë: polic në një shoqëri që i ka thënë lamtumirë dinjitetit. I cili ky i fundit aty është dhe pa lekë madje. Mjafton ta veshësh si kostum e të bëhesh etalon rrjetesh sociale. Shikoni ndjesën e Veliut sa dinjitoze është. Shikoni faljen e Çobos sa e fisme duket.
Comments
Shembulli
Mire qe nuk na kane kerkuar te dalim neper ballkone, te duartrokasim ... per kete akt madhor qe paskan bere keta!
Add new comment