Miniparlamenti i intelektualëve ambulantë

Postuar në 08 Mars, 2017 12:46

Keni dëgjuar sa shumë ankohen “intelektualët” për mediat dhe gazetarët? Sesa shumë moralizojnë për gjjuhën e përdorur në Parlament nga deputetët? Patjetër që kanë të drejtë. Mirëpo dikush mund të pyesë se çfarë bëjnë ndryshe këta intelektualë, vepra e vetme e të cilëve po mbetet moralizimi si ushtrim retorik?

Këta zihen. Zihen njësoj si deputetët në Parlament dhe me gjasë edhe shantazhojnë mes rreshtave njëri – tjetrin, duke na dhuruar teatrin e vetvetes, piramidës së vlerave ku jemi lëshuar revan të gjithë të hipim në majë, pasi poshtë kemi lëshuar të pëgërët tonë, që duam t’u ikim.
Rastet janë disa, por kjo e fundit, e përballjes për rolin e Diana Çulit në ekzekutimin e dy poetëve, Blloshmi dhe Leka, është lodhëse.

Lojën e ka hapur Agron Tufa, që në kohën e PD-së kalonte bajagi mirë. Tufa i është vërsulur Çulit duke e quajtur vrasëse. Më pastaj lindi “debati” ku kanë shtuar të gjithë “të shquarit” ndonjë çikë miell në zejen e veçantë të kritikës. Dhe nuk ka zgjatur shumë që shkrimtarët të bëhen një çikë deputetë.

Sadik Bejko postoi në Facebook ca rreshta, mes të cilave e quante Tufën të pagdhendur.

A tufa B Njuma E Bardhuli A Peci, disa prej ketyre ish studente te m’i,po ngjajllin prape per interesa… antagonizma, protagonizma, preferencA paresh, bordesh a biznesi, pra, jo nga parime te qendrueshme e te larta morali jo se u plasi per Vilsonin dhe Genc Leken, por po debatojne si ne erresire per dicka qe une e kam dokumentuar e kthjelluar. Keta ish studente qe nuk lexojne paraardhesit shtiren te ngjiten ne qiej per te luftuar me diaj e me engjej, por per interesa tokesore. Jo parimore. Djajte jane rrezuar ne ferr prej kohesh dhe perjete e kane vendin ne ferr. Diana Culi nuk eshte vrasese. Me keq se nje vrasese, ajo eshte nje fantazme. O eshte nje fantazme e bukur. Nen teshat e fytyren e saj te bukur jane eshtrat e kalbura mishrat e kalbura jo te njerzve. Jo Diana nuk ka vrare Njerez. Njerezit i vriste Enveri, diktatura. A Tufa eshte I nxituar. Ai thote se Diana vrau njerez. C’i pagedhenduR qe e quan vten profesor. Madje profesor I studiuar ne Moske. Per mua disa nga kete pRofet jane fare”.

Tufa nuk ka vonuar fare, por haazërxhevap Bejkos me një status të vetin:

Duket se ne gryke Bejkos i flet rakia dhe produktet e Qoftore “Tymi”. Bekjo e di mire se Tufa ne ketë histori nuk ka leverdi projektesh, perveçse zavalleve. Nuk ka leverdi financiare, siç pati ai me librin e tij “Vilsoni dhe Genci”, ku nuk guxoi te permendte enrat realë te atyre qe bene akt-ekspertizat, a thua se ato i shkruan zogjte e malit.Por dihet: e verteta ben shumë armiq! Dhe raportet me të Verteten, lavdi Zotit, nuk m’i kushtezojne dot njerez te mbeshtjelle me kunfuzione e mjegulla si Saturni me unazat…”.

Të vjen të qash kur kupton sa leshko del teksa lexon titujt e magazinës informative, “Panorama” që i publikon këto xhevahire dhe lëshohesh të kuptosh ndonjë gjë për poetët dhe rolin e Çulit. D.m.th ndonjë gjë të re, me besimin se gazetarët e kulturës, këta periferikë permanent të faqeve të fundit, po dalin në dritë me ndonjë kontribut të mirëqenë. Jo. Ti lexon akuza për tendera e projekte, lëviz leku me dosje poetësh e të tjera si këto. Xhanëm romuzet për rakinë e qoftoreve mbeten kënaqësia stilistike që merr nga këta babaxhanë të letrave që avash avash po popullojnë Olimpin policenrik që la pas Olimpi i zvjerdhur i Lidhjes së Shkrimtarëve e që këta po i shohin leverdinë. 

Sa të del rrudhja e buzëve nga ky sherr fshati si për krushqi të prishura, lexon se Shaban Murati qenka përplasur për çështjen e kombit me Artan Fugën. Murati ka zbuluar se Fuga/t hanë në dy sahanë: një të qeverisë e një të opozitës. Kjo sipas tij bën lidhjen te Katovica që në Shqipëri është shndërruar në karikaturë. I është përgjigjur në mënyrë ambula(nte)tore Artan Fuga, me siguri nga tastat e celularit, ku zhvillohet së fundmi gjimnastika filozofike e brenda unazës.

U çmend edhe Shaba”, shkruan Fuga, duke lënë të kuptohet se ai shikon shumë të çmendur në këtë vend.

Iku! Komike! Unë tendera?! Hahaha! Gërmo qen gërmo se taren e ngordhur do të gjesh!” shprehet profesori i Filozofisë.

Pak më poshtë një fjali që i shton lezetin debatit:

U mo Shabë kujton se do të merrem me ty, ti që ke ditur dhe katovicën, kakovicën, edhe katuan, por jo vetëm”.

Kjo është shqipja e të lëçiturve. Të paktën na provojnë se poshtë titujve që marrin, çmimeve dhe siç thonë edhe vetë, poshtë verdhushkave, qëndron njeriu, e brenda tij, shqiptari si opus magnum e kësaj treve. Ndaj mos kuotoni me pritmëri shkarravinat e këtyre njerëzve që shfaqen sa nga njëra gazetë në tjetrën, që dinë të shajnë dhe mallkojnë më mirë e më shpesh se kushdo tjetër. Polemika e të cilëve orbiton te rromuzet e Kinostudios, për të tërhequr zvarrë e katapultuar për publikun, mëritë, cinizmin dhe pse jo urrejtjen që kanë për njëri-tjetrin. Vallë idetë e prodhojnë këtë kataklizëm kolosësh? Patjetër edhe ato. E kemi për traditë që përplasemi për idetë. Aq më tepër që tani Facebook të hap udhë të reja.

Shaptilografisti

Add new comment

Plain text

  • No HTML tags allowed.
  • Web page addresses and e-mail addresses turn into links automatically.
  • Lines and paragraphs break automatically.