Çfarë loje luan opozita?

Sot pas ofertës së përfaqësuesve të koalicionit qeverisës, PD-ja, apo më saktë kryetari i saj, mbajti disa qëndrime. Ose një qëndrim me disa shprehje. Në darkë, përmes një postimi në Facebook, Basha ka lënë të kuptohet se qeveria teknike është kush i panegociueshëm.

Po dialogut me një temë: qeveri teknike për zgjedhje të lira dhe të ndershme. Nuk ka tërheqje, nuk ka dorëzim, nuk ka pazar. Koha e pazarave politike në kurriz të qytetarëve ka marrë fund. Elita e korruptuar e republikës së vjetër duhet ta harrojë se ky shesh do të zbrazet pa arritur zgjedhje të lira dhe të ndershme.  Qeveria teknike është kusht i patjetërsueshëm për të garantuar zgjedhje të lira dhe të ndershme dhe për t’i hapur rrugë zbatimit të reformës së vërtetë në drejtësi, sipas përcaktimeve kushtetuese

ka thënë Basha.

Më herët, ai zhvilloi një takim me aleatët e vet, ku termi qeveri teknike nuk ishte kaq kategorik. Ndoshta konkluzionet e vizitës së Mogherinit nuk i kanë lënë rrugë tjetër kreut të PD-së, i cili në çdo rast sot provoi se ka hyrë në protestë pa një bllok përgjigjesh që mund të duhen në rast të zhvillimeve të caktuara. Lëkundja e verifikuar sot na dëshmon se Basha dëshiron ta lërë protestën, por duke ruajtur fytyrën. Sa më shumë e ngre zërin ai tashmë, aq  më i pabesueshëm bëhet. Skenari që PD-ja të vijojë protestën për të bllokuar komsionet e vettingut do të kishte kostot e veta, ndonëse opozita është në të drejtën e vet të protestojë pavarësisht kësaj. Ajo çfarë është shqetësuese është fakti se ky person nuk është gati për të marrë pushtetin në kuptimin që të drejtojë një forcë politike drejt pushtetit. Ky është problem strategjik për PD-në dhe opozitën. E cila nuk ka se çfarë të kërkojë më, qoftë edhe si albi për disa, përpos garancive në zgjedhje. Dhe nëse bën Pazar edhe këtu atëherë moralisht dëmi ndaj vendit është shumë i madh. E themi këtë pasi në katër vjet, përveç ligjit të dekriminalizimit, PD-ja nuk bëri asnjë betejë të vërtetë.

Lufta ndaj Ilir Metës ishte koniunkturale, goditja për kanabisin po ashtu. Kushdo që ndjek sadopak politikën e ka kuptuar se është dështim i plotë që PD-ja nuk ka arritur edhe sot që flasim të imponojë të paktën largimin e ministrit të Brendshëm, Sajmir Tahiri. Jo ta kërkojë, por ta detyrojë, sa kohë që aktualisht vetëm sot, kryeministri dhe ministri i tij kanë folur për një Pakt Kombëtar për kanabisin. Pra për dështimin e luftës ndaj kanabisit që e kanë mbrojtur deri më tani. Çka do të thotë se mjafton vetëm rezultati që qeveria na thotë që opozita të bëjë kauzë largimin e këtij ministri, pa folur pasyaj për skandalet e shumta. Fakti që opozita mjaftohet me beteja gjysmake, duke lënë në fuqi të paprekur njerëz të diskredituar dhe shoqërisht të dyshimtë, në mos të rezikshëm, si Sajmir Tahiri, na provon se ose PD-ja me Bashën nuk kanë fuqi, ose pas tyre luan Berisha për axhendën e vet, ose janë të dyja bashkë në funksion të një alibie për humbjen eventuale të zgjedhjeve nesër. Kjo nuk është lojë e re. Koha po mbaron dhe opozita të paktën duhet të zbulojë se çfarë janë për të garancitë elektorale. Për qeverinë teknike, me keqardhje për të gjithë ne duhet të pranojmë se kjo e PD-së po na provon se në pushtet nuk vihet me zëdhënësa si Lulzim Basha.