Gratë i japin fitoren doktor Muharremit

Muharrem Rama, kandidati i majtë për zgjedhjet e bashkisë së Dibrës fitoi garën ndaj rivalit të tij Sherefedin Shehu. Avantazhi i Ramës në 118 kutitë e numëruara Rama është 4 160  vota dhe kësisoj, kandidati i koalicionit të majtë do të jetë kryetari i ri i bashkisë së Peshkopisë. Votimi i djeshëm u shoqërua nga akuza për blerje votash nga të dy palët politike. Ndërsa PD akuzoi se banorët e një fshati në Dibër kapën një fugon me miell që do shpërndahej në këmbim të votës, nuk munguan as akuzat për fotografimin e votës nga të dyja palët. Ajo që bie në sy është përqindja e lartë e femrave në këto votime, me rreth 58 % të pjesëmarrjes. Në Dibër u mbajtën zgjedhje pasi ish-kryebashkiaku, Shukri Xhelili u shkarkua nga detyra për shkak të përfshirjes së tij në një aferë seksuale.