Çfarë fshihet pas pikturës “Peshkatari plak” të piktorit hungarez Tivadar Kostka Csontvary?

Lojërat e piktorëve me punët e tyre janë të shumta. Apo qoftë edhe “të fshehtat". P.sh kemi dëgjuar të gjithë për komentet dhe trajtesat e pafundme mbi piktura të Leonardo da Vinçit. Ka në fakt edhe “sekrete” më të vogla se ato të da Vinçit, por që janë po aq kurioze. Një është edhe piktura “Peshkatari plak” e piktorit hungarez Tivadar Kostka Csontvary, realizuar më 1902. Sekreti i saj, i fshehur gjithsesi jo me aq këmbëngulje, u zbulua relativisht vonë. Me një pasqyrë në mes, kjo pikturë, sipas dy anëve të vendosjes, riprodhon si imazhe shëmbëllyese, një herë Zotin, si një plak i qetë e i trishtuar dhe njëherë Djallin. Të dy të fshehur pas peshkatarit të vjetër, me sa duket sipas motivit biblik të peshkatarit të shpirtrave.