Zgjerohet lista e Moskës kundër sanksioneve, produktet bujqësore shqiptare nuk do të pranohen në Rusi
Pak kohë pasi Rusia njoftoi se do të hiqte embargon ndaj produkteve bujqësore shqiptare, ky vendim mund të rikthehet sërish. Lista e vendeve të ekspozuara ndaj kundërsanksioneve të Rusisë mund të zgjerohet edhe me 7-të vende të tjera, që ju bashkuan sanksioneve shtesë ndaj Moskës, javën e kaluar. Në këtë listë bën pjesë edhe Shqipëria. Lajmi është bërë i ditur nga një zyrtar i Ministrisë së Bujqësisë, për agjencinë ruse të lajmeve, “ItarTASS”. “Nëse zgjerojnë listën, ne do të godasim pikërisht ato vende që kanë shprehur dëshirën të bëhet pjesë e sanksioneve kundër nesh. Ne do të deklarojmë kundërsanksione ndaj tyre”, tha zyrtari që ka preferuar të qendrojë anonim. Sipas informacioneve, Ministria ruse e Bujqësisë mund t’a diskutojë këtë listë vendesh. Ndërkohë, lista e produkteve nuk do të ndryshojë, nëse Rusia vendos të kundërprëgjigjet duke zgjeruar numrin e vendeve. “Do të jetë e njëjta listë produktesh për shumicën e vendeve. Përjashtim mund të bëjë vetëm Islanda, ku mund të përfshihen edhe disa produkte specifike, si peshku”, shtoi zyrtari rus. Më herët, agjencia ItarTASS raportoi se kryeministri Dmitry Medvedev do të merrej personalisht me zgjerimin e listës së kundërsanksioneve. Shtatë vende europiane, Shqipëria, Mali i Zi, Islanda, Norvegjia, Litenshtajni, Ukraina dhe Gjeorgjia, konfirmuan javën e kaluar se, do ti bashkohen sanksioneve shtesë të Bashkimit Europian ndaj Rusisë. Shqipëria dhe Mali i Zi janë vende kandidate për tu antarësuar në Bashkimin Europian, ndërsa Islanda, Norvegjia dhe Litenshtajni janë pjesë e zonës europiane të tregtisë së lirë.
Add new comment